Footer

KOMENTARIO: Pannakakanta ti Ilocos Sur Hymn: tapno maipasagepsep panagayat iti nakaiyanakan a probinsia

Ania, makanta manen ti Ilocos Sur Hymn kadagiti opisina, pribado ken publiko nga eskuelaan ken mapatokar iti sign-on ken sign-off dagiti radio ken TV stations? Ne,  napintas a panggep dayta ket kanunonganmi unay! Naindaklan unay nga addang daytoy para ti pannakatagiben ti panagayat iti nakaiyanakan ken ingungoten a probinsia. Tapno maipasagepsep iti asinoman ti kinapateg ti cultural patrimony. Saan laeng a maibayog ti rikna ti nasionalismo kabayatan ti panangkanta no di pay itag-ayna dagiti tinawid a nasasayaat a kababalin dagiti immuna a kaputotan.

Nabayagen a saan a nakankansion daytoy a himno. No saan nga agbiddut ti memoriak, makankanta ti himno sakbay ti martial law iti eskuelaan ken kadagiti opisina ti gobierno, lalo iti flag ceremony. Sipapannakkel ken sidadayaw idi ti asinoman a mangkansion iti Ilocos Sur Hymn. First year high school pay la datao idi iti Narvacan National Comprehensive High School (NNCHS) ti malagipko a naudin a pannakakantana iti eskuelaan. Ta iti pannakaideklara ti martial law idi September 21, 1972 naisardeng ti pannakakansionna. No ania a rason a naisardeng, diak a matukod. Ngem ketdi nasukatan babaen kadagiti kankansion ti New Society, ket rimmimbaw dagiti samiweng ken ayug a nain-Tagalogan.

Idi panawen ti martial law, nasukatan ti porma ti gobierno ket amin nga opisina ti gobierno ket nagbalin a kagawaran nga indauluan ti maysa a minister. Uray dagiti eskuelaan ket nagaramat iti Tagalog imbes nga English. Gapu ta English ti pannakaisurat ti Ilocos Sur Hymn, posible a saan ngata a maitutop ken napapanawen idi a makanta.

Ngem ania itayen ti Ilocos Sur Hymn? Adda kadi makaammo iti daytoy a himno ita a henerasion? Adda kadi pay makaammo iti tonona? Adda kadi pay makaammo iti lirikona? Adu dagiti saludsod a nasken a masungbatan pay nga umuna. Ta nasuroken a tallopulo a tawen ti napalabas wenno tallopulo ket walo a tawen ti napalabas manipud idi naputar daytoy. Adu unayen a danum ti nagayus iti sirok ti rangtay. Nupay kasta, makunami latta a saan a nagbalbaliw ti nakaisangratan ti himno. Isu pay laeng ti panggepna idi ken ita.

Saan a maumag iti panaglabas ti panawen dagiti ayug ti kaputotan. Isu a ti intension wenno panggep manen a ‘panangriing’ iti himno ket maysa met a wagas ti panangpabaro ken panangpabileg ti intension wenno panggep ti himno.

Umno la unay ti panggep a pannakaidarirag manen daytoy. Ta rumbeng laeng a nanamen ken ibuksilan dagiti saan pay a nakananam iti kinapateg ken kaipapanan iti cultural patrimony daytoy. Rumbeng laeng a maisuro kadagiti ub-ubbing, agtutubo ken agkabanuag ti himno.

Rumbeng laeng nga ipategtayo daytoy kabukbukodan nga ayug ken samiwengtayo, kas ti Ilocos Sur Hymn.

Ngem ketdi, ipaganetgetmi a nasken koma a maisuro pay nga umuna ti tono ken lirikona iti sapasap. Saan koma a malibtawan ti kinapateg daytoy. Nasken a maiyadal nga umuna iti sapasap ti pakasaritaan daytoy. No asino ken ania ti nakaisangratanna. No asino ti nangputar wenno nangkompos ti lirikona. No asino ti nangaramid ti notana. Sumagmamano laeng dagitoy a nadakamat ti rumbeng a maammuan ti kaadduan tapno maited ti kredito kadagiti akingapuanan a kailiantayo.

Ket pagyamanan la unay ken ni Board Member Christian Purisima iti indatagna a resolusion a pannakakanta ti himno iti flag ceremony iti amin a pagadalan, iti man publiko wenno pribado ken kadagiti pasken ken okasion. Ket itoy a gakat, makipagkantakami iti sapasap.

Ti himno ket ayug ti puli. Nasken ngarud nga itandudo ken tagipatgentayo nga agnanayon.#