KOMENTARIO: Proklamasion ti amnestia ni Pres. Aquino, rekonsiliasion kadagiti bumusbusor iti gobierno (Maudi a paset)

Kas ninamnama, dinayaw dagiti rebelde a soldado ti amnestia nga impaay ni Pres. Ninoy Aquino kadakuada.

“Agyamankami iti Presidente agsipud ta dagitoy a soldado ket timmakderda a rimmupak maikontra iti korapsion ken iregularidad ti napalabas nga administrasion. Daytoy ti panangbigbig ti Presidente iti sakripisioda…” kinuna ni retirado nga Army Brig. Gen. Danilo Lim.

Kinuna pay ni Lim a mamati iti inaramidda… “kas maibatay iti pammilin iti babaen ti Konstitusion a mangprotektar kadagiti tattao ken iti estado.”

Kinuna met ni retirado a Col. Ariel Querubin a maragsakan iti amnestia nga impaay ni Pres. Aquino tapno maikkanen iti gibus ti kaso dagiti rebelde a soldado tapno rugianda metten a baliwan a bangonen ti careerda.

Kas ninamnama, adu met dagiti saan nga umayon iti desision ni Pres. Aquino a mangited iti amnestia kadagiti rebel soldiers.

Linagidaw ni Juan Pedro Navera, maysa kadagiti state prosecutors a mangig-iggem iti kaso maikontra ken ni Sen. Trillanes ken dagiti kakaduana a sumangsango iti kaso mainaig iti 2003 Oakwood Hotel mutiny, ti saan a pannakakonsulta ti Department of Justice iti daytoy a desision ni Pres. Aquino ken iti baet a mayur-uray ti pannakaiyetnag ti pangngeddeng ti Makati Regional Trial Court iti daytoy a bulan.

“No kayattayo a respetaren ti panagturay ti linteg, no kayattayo ti agtamed iti korte, urayentayo koma ti desision ti korte,” kinuna ni Navera sana sinaludsod: “Saantayo kadi nga interesado iti kinapudno? Saan kadi a daytoy ti panawen ti panangbirok iti kinapudno ken panangtunton iti kinapudno?”

Kuinestionaran met ti Episcopal Commission on Prison Pastoral Care ti Catholic Bishops’ Conference of the Philippines ti pannakaited ti amnestia iti baet a madesisionan iti mabiit ti kaso dagiti rebelde a soldado.

Iti biang ni Rodolfo Diamante, executive secretary ti CBCP commission, adda koma makita a panagbabawi dagiti maikkan iti amnestia idinto nga indagadagna a dagiti ketdi koma nabayagen a nakabalud a mayur-uray ti kasoda iti korte ti iyuna nga ikkan ni Pres. Aquino iti atension.

Iti napalabas, indagdagadag ti simbaan ti panangipaay koma ni dati a Presidente Arroyo iti pardon kadagiti marigrigat a balud, saan ketdi a dagiti prominente a balud. Maipalagip nga inikkan ni Arroyo iti pardon da dati a Pres. Joseph Estrada, Claudio Teehankee, Jr., Norberto Manero ken klemensia ken ni dati a Zamboanga Rep. Romeo Jalosjos.

“Panawenen a maikkan dagiti makurkurangan iti biag iti nawadwadwad a linteg…” kinuna pay ni Diamante.

Maysa a pagamkan dagiti umili iti pannakaited iti amnestia kadagiti rebelde a soldado ti panangisayangkatda iti sabali manen a kudeta wenno panagpanggep maikontra iti gobierno no adda saanda a magustuan iti pannakaipagna ti turay agsipud ta naturtureddan gapu iti pammati a maikkandanto met laeng iti amnestia no mapaayda. Iti sabali a bangir, no agballigida iti panggepda, agbalinda a bannuar iti imatang dagiti umili.

Maipalagip ditoy ti pannakaited idi iti amnestia kada Sen. Gregorio Honasan ngem kalpasanna, nagsasagannad dagiti insayangkatka a kudeta maikontra iti turay daydi nag-Presidente Corazon Aquino, ina ni Pres. Noynoy Aquino.

Iti met biang dagiti sumagmamano a kailian, saan a maikanatad a maikkan dagiti rebelde a soldado iti amnestia uray makuna a balido ti intakderda: korapsion ken iregularidad ken panagsuitik iti eleksion no di ket rumbeng laeng a sanguenda ti pannusa iti inaramidda.

Saan a malibak, nabara nga isyo ti panangpirma ni Pres. Aquino iti proklamasion para ti pannakaited iti amnestia kadagiti rebelde a soldado. Agpayso, prerogatibo ti Presidente ti mangted iti amnestia kadagiti soldado a nagtured a nangipeksa iti ikokontrada iti gobierno a korap ken maanomalia iti sirmatada ngem iti daytoy nga desisionna, saan nga amin a tao ket mapagustuanna. Addanto latta dagiti komuntra iti daytoy a desisionna.

Iti baet ti pannakabingay dagiti umili iti daytoy nga isyo, nagtimek metten ti Senado ket intedna ti pananganamongna iti pannakaited iti amnestia kadagiti rebelde a soldado. Nupay saan a nagpirma ni Sen. Joker Arroyo iti Resolusion No. 217 a  mangkiddaw ken ni Pres. a maipaayan iti amnestia da Sen. Antonio Trillanes ken dagiti soldado a naisaklang iti Oakwood mutiny, stand-off ti Marines idiay for Bonifacio ken pannakaukopar ti Manila Peninsula imbatadna a pabor iti amnestia.

Saan ngaruden a magawidan ti pannakaited iti amnestia kadagiti rebelde a soldado. Agtungpal kadi daytoy iti rekonsiliasion kangrunaanna kadagiti puersa a komonkontra iti gobierno?

Daytoy ti sungbatanto dagiti pasamak iti masakbayan.#