KOMENTARIO: Saan a kinarungbo ti panangselebrar iti Paskua ti pakarukodan iti kinakristiano (Nayonna)

Adda pay dagiti mangiyawat lattan iti sobre ket makaammokan a mangikabil iti gatad a kayatmo. Awan ti permit dagitoy ket di ammo no agpayso a maysa nga ahensia ti agur-ur-or iti pondo para “kano” kadagiti marigrigat a kailian. Adda pay dagiti estudiante kano a mamalaybalay nga adda lakoda a kankanen nga agpaay ti ganansiada kadagiti marigrigat nga ubbing.

Idi, dagiti laeng Igorot ti makipaspaskua ditoy Kailokuan. Ammomon no addada iti arubayan agsipud ta natibong ti gansa a pannakatamborda a mangkumpas iti panagtadekda.  Ngem ita, saan nga isuda laengen ti makipaspaskua ta makadanon payen dagiti Badjao ken dagiti Ita ditoy Kailokuan. Kas ita, naruayda ditoy Vigan City. Ti rigatna kadakuada ta saandan sa pay nga agdigdigos ken nadulpet ti pagan-anayda. Ti dakes pay nga ugalida ket agkalbitda kadagiti tattao.

Nasikap payen dagiti dadduma a makipaskua ita. No ammoda a galante dagiti agindeg iti barangay a pakipaskuaanda, bingayenda ti grupoda. Iti kastoy, nawadwadwad ti mapaskuaanda. Adu a bumalay ti saan a makadlaw iti daytoy a modus operandi dagiti makipaskua. Agsasarakton ti grupo no aggawidda.

Ngem kas nakuna ni Fr. Gerry Orbos iti maysa a homily, mammaminsan ti Paskua iti makatawen. Uray iti daytoy laeng koma a tiempo a nakaukrad ti dakulaptayo. Nasaysayaat ti mangted ngem ti umawat, nakunana idinto nga inyunay-unayna a ditayo koma agbalin a boksingero iti tiempo ti Paskua.

Kayo wenno kawayan a sinanpaltog ti aramidenmi a pagpaputok. Puted nga ulo ti lansa ti pagbalinenmi a firing pin.  No kinalbitmi ti gatilio, malettat ti firing pin ket tupaenna ti sabali nga ulo ti lansa a mamagbettak iti nabungon a pulbora.  Adda idin mailaklako a babassit a pulbora a naipagket iti naingpis a karton a kasla kupon bond ti kadakkelna ket daytoy ti saggaysa a pigisenmi sami ikabil iti pagtupaan ti firing pin.

Sabali pay a pagputokmi idi ti kawayan a kanion. Agpipinnasikatkami no asino ti makaaramid iti kanion a kapigsaan ti putokna. Kalboro ti usarenmi a pagpaguni iti kanion ket lata ti sardinas ti pannakabalana.

Ita, nagpipigsa dagiti rebentador a kas iti super lolo, whistle bomb, ken dadduma pay. No aggigiddan a mapabettak dagitoy, kasla paggugubatan ti kapigsa dagiti kanalbuong. Ngem uray kasano a panangiparit ti kapolisan ti panagpaputok, saan a malapdan dagiti tattao a  gumatang kadagitoy agsipud ta nakaugalianen ti panagpaputok iti panangsarabo iti Paskua nangnangruna iti Baro a Tawen.

Saan a nakakaskasdaaw no apay nga adu ti bilang dagiti mayospital gapu iti paputok. Adu dagiti madangran gapu iti kaawan ti disiplina dagiti dadduma a kailian. Sindianda ti rebentador sada igagara nga ipuruak iti sanguanam. Urayka la agkulagtit iti kigtotmo ket no adda sakit ti pusom, maatakeka la ketdi!

Iti met Paskua ken Baro a Tawen ti gundaway dagiti polis ken dadduma nga adda paltogna a “mangasa” iti armasda. Gapu iti kapipigsa dagiti rebentador, narigat a mailasin ti kanalbuong ti paltog iti napabettak a rebentador. Dayta ti gapuna a tunggal baro a tawen, maputipotan ti murdong ti paltog dagiti polis tapno masigurado a dida mapaputok. Yan ti rigatna, agraira met ti paltog ditoy pagilian!

Idi, sumursurotak met a mapan makimisa de gallo. Ngem insardengko manipud idi dandani napuntaan datao iti naiwawa a bala nga imputok ti maysa a tao a dina ammo a panunoten a mabalin a makadangran iti tao. Agasem ta simmanengseng ketdin ti bala iti asideg ti mugingko! Indulinko idi daydi kapsula tapno adda pakalaglagipak iti kinaawan disiplina dagiti dadduma a kailian ngem naiwagatko idi immaliskami iti pagtaengan idi addan pamiliak. Ngem agingga ita, urayak la agalinggaget no malagipko daydi a pasamak!

No malagipko ti napalabas, diak magawidan ti saan nga agsennaay. Saan ngatan nga agsubli pay ti kasta kasimple a panangselebrar ti Paskua idi naganuskami pay. Wen, adayon ti kalman. Sabalin ti kita ti panagbiag ita. Pinagbaliwen ti moderno a panagbiag ti wagas a panangselebrar iti Paskua.

Kas nakaugaliantayo, rambakantayo ti idadateng ti Paskua, ta daytoy ngarud ti karagsakan nga aldaw iti kristiano a lubong – ti pannakaipasngay ti Mesias, ti Ari dagiti Ari, ti mannubbot a mangisalakan iti lubong. Ngem ti lagidawenmi ti panagbaliw ti panangrambak iti tiempo ti Paskua. Kasla nagpukawen ti naun-uneg a kaipapanan ti Paskua. Naitalalin ti kinaparammag ken kinapasindayag ken nagbalinen a materialistiko dagiti tattao.

Saan a ti kinarungbo wenno ti kinanumo ti panangselebrar iti Paskua ti pakarukodan iti kinakristiano ti maysa a tao. Saan a pirak wenno napapateg a regalo ti nasken iti panangrambak iti ipapasngay ti Mesias. Ad-adda a napateg ti ayat ken kappia a saguttayo iti padatayo a parsua ditoy lubong. Dayta ti insangbay ti Anak ti Dios iti pannakaipasngayna iti kulongan dagiti ayup. Nayanak ni Hesus a nanumo uray isu ti Mesias tapno ipaneknekna nga iti imatang ti Ama, awan ti nabaknang, awan ti marigrigat, agpapatas ti amin. Dayta ti naun-uneg a kaipapanan ti Paskua.#