KOMENTARIO: Saan a kinarungbo ti panangselebrar iti Paskua ti pakarukodan ti kinakristiano

Dakkel ti nagbalbaliwan iti panangselebrar iti Paskua idi ken ita. Idi ubbingkami, simple laeng ti panangselebrarmi iti Paskua. Saan a kas ita a nagbalin unayen a commercialized ti selebrasion ti Paskua.

Idi ubbingkami pay, makalawas sakbay ti Paskua, naisaganamin dagiti ramit nga aramatenmi a makipaskua kas iti napitpit a tansan nga ilansami iti akikid ken sangadapan ti kaatiddog a kayo wenno kawayan. Piangpiang ti awagmi iti daytoy aramatenmi a pangkumpas iti kantami. Dagiti kakaduak, mangaramidda iti tambor manipud iti dakkel a lata ti gatas. Tunggal malem, no aggapukami iti eskuela, agensayokami nga agkanta kontodo tambor ken piangpiang iti likudan ti eskuela wenno iti paraanganmi.

Idi, parol a kawayan a nasakaban iti namaris a papel de hapon ti maisab-it iti ngatuen ti tawa, saan a kas ita nga agpipinnasindayag dagiti bumalay nga agisab-it kadagiti aggiddep-agsilaw a dekorasion. Idi, burarawit, adu ti sangana a salamagi ket kadagiti adda bassit kabaelanna iti biag, saleng a krismas tri ti madekoraran iti babassit a bituen ken bola a makaluban iti dekolor a papel de hapon, saan a kas ita a plastik ti krismas tri a pakaibitanan dagiti dekorasion a magatang kadagiti pagtagilakuan.

Idi dekada 1950s, ad-adda a kankanen ti ipapaskua dagiti bumalay. No aggawidkami, namutittitkami wenno nadagsen ti bitbitmi a patupat, sinuman, tinubong ken dadduma pay. No adda nikel (awagmi iti lima a sentimo) nga iyawat ti bumalay a pakipaskuaanmi, naragsakkamin. Dakkelen ti balor ti nikel kadaydi a tiempo. Adun ti magatangna. Saan a kas ita a no ikkam iti singkuenta pesos a balon ti anakmo a mapan agbasa iti uneg ti ili, agmisuot la ketdi ta awan met ti mabatin a para meriendana no maikkat ti pagpletena a mapan ken aggawid iti pagadalan.

Idi, uray disintonado, uraykami la agraed a mangipasaksak iti sumagmamano a kantami tapno teggedenmi ti mapaskuami.  ngem ita, “Paskuayo apo,” kuna lattan dagiti ubbing ket urayendan ti iyawatmo. No agkantada man, maminsan laeng. Adda pay dagiti saanen nga agyaman no tagibassitenda ti iyawatmo a kuarta. Agmirugrogda payen no binting wenno salapi laeng ti ipapaskuam. Uray piso tagibabaenda pay. Ania ngarud ket adu met nga agpayson ti bimmabaan ti balor ti pisostayo.

(Adda tuloyna)