Footer

KOMENTARIO: Turismo iti pagilian, maipalpalikud ti Amianan a Luzon? (Umuna a paset)

Iti pannakipartisipar ti Pilipinas iti The International Tourismus Borse (ITB), kadakkelan a travel fair iti Asia, idi Oktubre 22-24 itay napan a tawen sadiay Suntec City, Singapore, limmawa ti ridaw ti turismo ti pagilian. Agdagup iti 60 a nasion ti dimmar-ay kadaytoy a travel trade fair a buklen ti nasurok a 5,000 a delagado.

Malaksid a nagun-od ti Pilipinas ti kapipintasan a booth, dimmakkel pay ti tiansana a maiplatitona ti dakkel nga ilgat turista nga agbisita iti Asia.

Kaunaan daytoy a travel fair iti Asia. Nainaw manipud iti ITB-Berlin, ti tinawen a travel fair a mangpappapigsa iti turismo iti sibubukel a Europa.

Dakkel la ketdi ti magun-od ti pagilian a positibo a benepisio nga inna ikaban ken pagpuonan iti masakbayan babaen ti pannakipasetna kadagiti kakastoy a travel fair. Maipangato ti Pilipinas iti listaan dagiti pagilian a kas kangrunaan a turongen dagiti turista. No adu ti turista, adu ti trabaho, adu ti malako a produkto ket bumlad ti bulsa ti nasion.

Lagidawenmi laeng ti kasla bangking a bingay kadagiti agsangpet a turista ta nakasentro wenno kunaenmi pay nga insentro ti ahensia ti turismo ti ‘panangilakoda’ ti Pinas kadagiti probinsia ti Aklan, Bohol, Palawan ken Cebu. Kasapulan koma a sapasap a pagilian ti ‘ilako” ti nasao nga ahensia ta saan met laeng nga iti abagatan ti yan ti industria ti turismo.

Agpayso, napigsa ti awis dagitoy a lugar kadagiti turista a managayat iti nakaparsuaan, nadalus ken makaguyugoy a beaches, nalaka a resorts ken otel ken babaen ti napinget a panangipromot dagiti agtuturay iti lugarda.

Idi timmabuno ti Tawid News Magasin iti Bohol para iti National Press Congress nga inangay ti Publishers Association of the Philippines, Inc., dimi ninamnama ti kapinget dagiti agtuturay a mangipromot iti probinsiada a kas tourist destination.

Naipakete iti press congress ti maysa a tour nga insagut ti provincial government kadagiti agiwarwarnak, ket napasiarmi dagiti daan a simbaan, ti lugar a nakapasamakan iti blood compact iti nagbaetan da Legazpi ken Raha Humabon, ti man-made tree park a nakaimulaan dagiti rinibribu a tattao, ti Chocolate Hills no sadino a pakasarakan kadagiti pinulpullo a turod a sukog-naipattog a nagtimbukel a tsokolate ken dadduma pay a napipintas a lugar iti probinsia.

Ngem kangrunaan a di malipatan ti grupo ti panangipaay ti municipal government ti Loboc iti river cruise kadakami a nagtunged iti pakabuyaan kadagiti tarsier. Malaksid a nagpennek dagiti periodista iti nabaknang a pangngaldaw iti mismo a barge bayat ti panagdaliasatda iti karayan, saan a mapulsot ti panangipatangatang dagiti local crooners kadagiti naparagsit ken makapalung-ay a kantada.

Kasta met nga iti mismo nga uneg ti daan a simbaan ti Loboc, kinantaandakami ti children’s choir nga impannakkel ti mayor a nangabak a kalaingan iti maysa a pasalip iti choir competition a naangay iti maysa a pagilian iti Europa. Saan ngarud a nakakaskasdaaw nga uray dakami, dinayawmi ti kinalaing dagitoy ubbing a kaadduanna ti agbasbasa iti elementaria.

Adda koordinasion dagiti nadumaduma nga ahensia iti pannakaipromot ti turismo ditoy. Saan a problema ti pagluganan ken pagdagusan.

No kayatmo ti agpasiar, ibagam laeng iti otel a yanmo ket mangayaben iti taksi a mangidanon kenka iti disso a kayatmo a pagparangan.

Kas iti Panglao Island nga agdindinnamag a yan dagiti beach resorts, madanon babaen iti taksi. No aggawidka, mateleponuan ti taksi ket umaynaka met la alaen.

Sakbaykami a naggawid, napankami iti Panglao Island tapno lumang-ab iti pul-oy baybay. Nagmalmalemkami iti beach ken nangrentakami iti cottage. Okupado dagiti cottages. Kaaduanna a ganggannaet dagiti agpagnapagna iti igid ti baybay..

Naammuanmi a magustuan dagiti retirado a ganggannaet ti mangrenta iti cottages iti sumagmamano a bulan tapno ditoyda nga agpapigsa wenno mangnanam iti biag a natalna, natalged ken adayo iti naasuk a siudad.

Ngem makunami met a saan a paudi ti Amianan a Luzon no maipanggep kadagiti lugar a magustuan la ketdi dagiti turista a pagpallailangan.

Mangdakamattayo iti sumagmamano a maipannakkel ti Rehion Uno a lugar a pangawisan kadagiti turista:

Iti Pangasinan, adda ti Tondalungan Beach, Bonuan Beach ken People’s Astrodome iti Dagupan City ken ti Hundred Island iti Alaminos City;

Iti La Union, adda ti Poro Point, ti Kasay Marine Sanctuary iti Barangay Canaoay ken San Vicente a pakasarakan iti agtawen iti 50 a higante a clam; dagiti beaches iti San Juan, San Fernando City, Bauang, Agoo wenno Caba; ti Botannical Garden ken Seven Hills iti San Fernando City.

Iti Ilocos Norte, nalatak metten ti Pagudpud Beach, ti solar windmill iti Bangui, ti La Paz Sand Dunes iti Laoag City, Cape Bojeador Lighthouse iti Burgos, Paoay Lake National Park ken dadduma pay a tourist spots.

(Adda tuloyna)