KOMENTARIO: Water lily: sumingsingising a pamastrekan (Tuloyna

Tapno ad-adda pay a natibker ti gapuanan dagiti lumalaga iti Las Piñas, nagusarda iti kabaruanan a tekniko babaen ti panangilaokda kadagiti babassit a metal ken barut a kas frame dagiti lagaenda. Babaen ti inisiatibo ni Congresswoman Cynthia Villar, naaddaanda iti kompleto a ramit, gadgets, machine a kas iti cutter, paint sprayer, welding ken oxi-acetelyn, oven ken dadduma pay tapno naparpardas ken ad-adu dagiti mapartuatda a produkto, ken kangrunaanna, makapartuatda ti dekalidad ken artistiko a produkto a kas  kidkiddawen ti nainlubongan a merkado. Nasken a ragpatenda ti kidkiddawen a kalidad ti nainlubongan a merkado tapno ad-adu pay ti agorder ken gumatang kadagiti partuatda ken dakdakkel ti mapastrekda.

Rumbeng la unay a siripen ken adalen met dagiti agtuturay ti Caoayan, Ilocos Sur no ania ti sekreto dagiti nadakamat iti ngato nga ili ken siudad tapno ad-adda pay nga agballigi itoy ingganuatda a panguartaan.

Iti handicrafts industry, maitutop la unay nga alaen nga umuna ti ekspertismo ti Technical Educations and Skills Authority (TESDA) maipapan itoy. Agtaud itoy nga ahensia ti lehitimo a training ken panagadal no kasano ti aglaga, dagiti kabaruanan a tekniko, ania dagiti rumbeng nga aramiden ken dadduma pay.

Kasapulan a kiddawenda iti Department of Social Welfare And Development (DSWD) ti pannarabay iti pannakabuangay dagiti agtutubo, out of school youth, ken asinoman a mayat a makipaset itoy a gannuat ta ekspertoda iti panagbuangay iti naurnos ken mapangnamnamaan nga organisasion. Kalpasan ti training ken organization, umasidegda nga agarungaing iti Depatment of Trade and Industry (DTI) para iti posible a tulong pinansial, grant wenno pagtaudan iti pundo a gastosen a paggatang kadagiti ramramit ken machinaries nga usaren.  Nalaklaka  a maaprobaran ti aplikasion iti DTI grant no adda endorso ti TESDA ken DSWD ta nagtaud a mismo kadakuada ti ekspertismo ken talento dagiti amin a makipaset itoy a pamastrekan.

Kiddawen met ti pannarabay ken itutulong ti Department of Labor and Employment ta addaanda met iti programa  mainaig iti panguartaan dagiti umili.

Nasken a badangan ti lokal a gobierno dagiti amin a line agencies a siaayat unay a tumulong kadagiti amin a mayat nga umasenso iti panagbiagda.

Tapno maikkan iti ad-adu pay nga idea ken impormasion maipapan itoy, nasaysayaat no bumisita ti lokal a gobierno ti Caoayan babaen ti panangidaulo ni Mayor Germelina Goulart inton Hulio sadiay Las Piñas ket saksianda a mismo ti Water Lily Festival ket umadawda iti idea no apay a nagballigi ti siudad iti water lily handicrafts. Pagaammo la unay a naasideg ti probinsia ti Ilocos Sur kadagiti ag-Villar ta sinuportaranda idi ti kandidatura ni Senador Manny Villar iti napalabas nga eleksion ti kinapresidente. Ni Congresswoman Cynthia Villar ti kaingungot ti senador.

Kasapulan la unay ti mangigannuat iti maysa a pagkuartaan dagiti umili ti pinget ken panangusar kadagiti amin a resources tapno agballigi.

Para iti isisingising ti water lily handicrafts iti ili, nasken nga agtignay itan dagiti agtuturay iti Caoayan a mangbitibit iti daytoy a pamastrekan. Nasken a maaddaan met ti Caoayan iti kabukbukodan a Water Lily Festival nga addaan iti  tema ken boses a “Laga, Caoayan”!#