Kompania ti seguro, natakawan

VIGAN CITY – Maysa a kompania ti seguro ditoy ti sinerrek dagiti mannanakaw ngem sensilio laeng ti nakasakasda.

Inreport ni Abigail Villanueva, manager, a natakawan ti Insular Life Insurance Co. a masarakan iti Gov. Reyes St., Barangay I, ngem saan a nagballigi dagiti mannanakaw a nanglukat iti kaha ket sensilio laeng a mapattapatta nga agdagup iti P50 ti naitarayda iti nasao nga opisina.

Segun iti report, nakastrek dagiti mannanakaw iti uneg ti opisina babaen ti panangakkalda iti airconditioner.

Pinadas dagiti di pay nabigbig a mannanakaw a luktan ti kaha ngem saanda a nagballigi.

Madama ti inbestigasion mainaig iti nasao a panagtakaw.

Iti sabali a damag, natakawan ti maysa a reloading station ti selpon ditoy ket intaray dagiti mannanakaw ti sangapulo a nagduduma ti klasena a selpon.

Nagreport iti polis ni Crispin Figuerres, 30, baro, akinkukua ken mangimatmaton iti nasao a reloading station a natakaw iti puestona ti dua a selpon a Sony Ericcson ken 8 a nagduduma ti klasena a selpon a Nokia.

Dinadael dagiti mannanakaw ti akinsango a tawa ket ditoy ti simrekanda.#