Konduktor ti bus, napaltogan

MAGSINGAL, Ilocos Sur – Iti baet ti nainget a kampania ti kapolisan maikontra iti loose firearms, sabali pay a kaso ti pammaltog ti naireport iti police station ditoy idi sardam ti Hunio 15.

Naireport a napaltogan ni Ronnie Selibo y Galagar, 35, baro, konduktor iti Partas Bus ken residente iti Barangay San Francisco, Agoo, La Union bayat ti panagdaliasat ti luganda iti national highway a sakup ti Barangay Barbarit ditoy nga ili idi agarup 6:55 ti sardam ti nadakamat a petsa.

Iti inisial nga inbestigasion dagiti polis, agpaabagatan a direksion ti Partas bus idi inobertekan ti nalabaga a Honda XRM a minaneho ti maysa a di nabigbig a lalaki.

Binusinaan ni Baltazar Duzon y Alcantara, 45, nagmaneho iti Partas bus, ti drayber ti motorsiklo ket naginayad ken nagpaigid daytoy iti abaga ti kalsada.

Inobertekan ti bus ti motorsiklo ngem sumagmamano a segundo kalpasanna, inobertekan met ti motorsiklo ti bus sa pinaputokan ti drayber ti motorsiklo ti bus iti namindua a nakatamaan iti windshield ken iti makannawan a pungupunguan ti konduktor a nakatugaw iti asideg ti ridaw.

Naglibas ti suspek a nagpaabagatan kalpasan ti pammaltog.

Naitaray ni Selibo iti Magsingal District Hospital para iti pannakataming ti sugatna.

Mapapati a cal. 45 ti naaramat iti pammaltog kas maibatay iti dua a kapsula a narekobre dagiti inbestigador iti crime scene.

Nakaala met ti doktor a nangtaming ken ni Selibo iti maysa nga slug iti makannawan a pungupunguan daytoy.

Agtultuloy ti panagimbestiga dagiti polis mainaig iti nasao a pammaltog.#