Konsehal, ginudas 2 lalaki riding in tandem

NARVACAN, Ilocos Sur – Nangbiktima manen dagiti armado a tattao a nagkalubbon iti motorsiklo ket iti daytoy a gundaway, maysa a sangguniang bayan member ti ginudasda.

Nainaganan ti biktima a ni Delfin Escobar y Dato, 38, naasawaan, konsehal, residente iti Barangay Ambugat, Burgos, Ilocos Sur.

Segun iti report manipud iti polis ti nadakamat nga ili, adda ti biktima iti sanguanan ti Tonyrose Vulcanizing Shop iti igid ti kalsada ti Barangay San Jose idi agsapa ti Enero 21 ditoy nga ili idi pinaltogan dagiti di pay nabigbig a suspek a naglugan iti motorsiklo.

Madama a karkargaan ti biktima ti pilid ti luganna idi nagandat ti biagna.

Naglibas dagiti suspek iti di ammo a direksion.

Naitaray ti biktima iti Central Ilocos Sur District Hospital sa naiyalis iti Metro Vigan Cooperative Hospital gapu iti sugatna iti rupa ngem pimmusay iti agarup alas 12:30 ti malem dayta met la nga aldaw.

Nakarekobre dagiti nagresponde a polis iti maysa a kapsula manipud iti cal. 45.

Sinawar dagiti polis dagiti suspek ngem nakalibasen dagitoy.#