Konsehal Juan Carlo Medina, sumaruno a mayor iti Vigan City

VIGAN CITY – Naggibus met laengen ti guessing game no asino ti sumublat a mangiggem iti rienda ti turay ditoy siudad iti sumaruno a tallo a tawen.

Sakbayna, idi alas tres ti malem ti Oktubre 16, maudi nga aldaw ti panagipila iti certificate of candidacy, nagturong ti grupo da Mayor Eva Marie S. Medina iti City Comelec Office tapno sangsangkamaysa dagiti konsehal nga agipila iti kandidaturada ngem agingga iti maudi a minuto, nagtalinaed a guessing game no asino ti mangsublat ken ni Mayor Medina nga agpatinggan ti terminona.

Idi madamag kadagiti incumbent councilors ken dagiti agsubli a konsehal no asino ti namnamaenda a sumukat ken ni Mayor Eva, sangsangkamaysa dagitoy a nangibaga a ni nag-mayor Ferdie Medina, kaingungot ni Mayor Eva.

Uray ni Gov. Ryan Singson, agingga iti maudi a kanito, saanna a maibaga no asino ti sumaruno a mayor iti Vigan City.

Kinuyog mismo ni Gov. Singson ti grupo ni Mayor Medina a nagturong iti City Comelec office tapno ipakitana ti suportana ken panagmaymaysa ti grupo.

Ngem iti maudi a kanito, saan a ni dati a mayor Ferdie ti nagipila iti kandidaturana a para mayor iti Vigan no di ni Konsehal Juan Carlo Medina.

Segun ken ni Mayor Medina, sada la napagtitinongan a ni Konsehal Juan Carlo ti agkandidato para iti kinamayor kalpasan ti pangaldaw iti maudi nga aldaw.

Sakbayna, impila ni Vice Mayor Lourdes Baquiran ti kandidaturana nga agpailayon a bise mayor idinto nga agpailayon da incumbent Councilor Ramil Arce, Kisses Agdamag, Benet Orio, ken Tenten Figuerres.

Agpailayon pay ni incumbent councilor Francis Arthur Ranches III nga isu ti kaunaan a nagipila iti COC.

Nagipila met iti maudi a kanito iti kandidaturana para konsehal ni Janina Singson-Farinas. Maipalagip a nagtakem a konsehal ni Singson-Farinas iti Siudad ti Vigan ngem naglusulos kalpasan ti panagasawana.

Agsubli met ni dati a Konsehal Henry Formoso kalpasan ti panagturpos ti terminona idi 2013. Sabali pay a naggraduar a konsehal, ni Herminigildo Apelin, ti agsubli iti konseho.

Unopposed ni Medina para mayor ken Baquiran para bise mayor.

Ngem dua nga independiente ti nangipila iti kandidaturada para konsehal.

Kabayatanna, adu a taga-Caoayan ti nagsiddaaw iti panagipila iti maudi nga aldaw ni Paulo Singson Ancheta, anak ni incumbent Mayor Germie Singson-Goulart, iti kandidaturana para mayor iti eleksion.

Maipalagip a naipilan ni Goulart ti kandidaturana kas reeleksionista a mayor iti Caoayan.

Nupay kasta, ni met la reeleksionista Belarmino ti para bise mayor.

Impalawag ni Goulart nga adu pay ti planona para iti Caoayan ngem kasapulanna ti at-atiddog a tiempo a manggun-od kadagitoy isu a sublaten pay ti anakna ti rienda ti turay ditoy nga ili iti sumaruno a tallo a tawen.#