Konsehal, naglusulos

CAOAYAN, Ilocos Sur – Ti kabsatna ti mangsukat iti naglusulos itay nabiit a konsehal ditoy nga ili.

Naglusulos ni Konsehal Randy Martinez, chairman iti finance and appropriation, iti puestona agsipud ta mapanen agindeg iti Canada.

Segun ken ni Martinez, idi indatagna iti sangguniang bayan a ti kabsatna a ni Philip Martinez, barangay kagawad ti Don Lorenzo Querubin, ti sumukat kenkuana, awan met ti kimmontra kenkuana.

Kinunana nga uray idi insingasingna ken ni Mayor Germie Singson-Goulart a ti kabsatna ti sumukat kenkuana, awan ti ikokontrana agsipud ta maysa met a konsehal iti barangay ken kapartiduan met laeng ni Martinez.

Nupay kasta, imparipirip ni Martinez nga adda posibilidad nga agsubli inton 2019 aglalo no saanna a kadagaan ti Canada.#