Konsehal, naglusulos a miembro ti committee on rules ti sangguniang panlungsod ti Vigan

VIGAN CITY – Ania ti masurot, praktikalidad wenno ti napag-aanamongan nga internal rules and procedures?

Limtuad daytoy kalpasan a naglusulos ti maysa a konsehal a miembro ti committee on rules ti sangguniang panlungsod gapu iti mapapati a saan a pannakasursurot ti internal rules and procedures a napag-aanamongan ti konseho a surotenda bayat ti session.

Kinuna ni Konsehal George Villanueva a saanen nga agbaliw ti pangngeddengna agsipud ta naiwaragawagnan ti panaglusulosna bayat ti session ti sangguniang panlungsod idi Hulio 29 ken iti imatang dagiti dimmar-ay a kameng ti media.

Sakbay daytoy, in-move ni Konsehal Kristen Benedict Figuerres a mairaman iti maikadua a pannakaibasa ti gakatna a mangamendar iti Health and Sanitation  Code  a naikalendario para iti first reading iti session idi Hulio 29

Segun ken ni Figuerres, naisayangkaten ti public hearing ti nasao nga ordinansa ket no masurot ti internal rules and procedures, agsipud ta naikalendario laeng iti first reading, maidatag daytoy iti committee on health.

No kastoy ti mapasamak,  maisayangkat ti sabali manen a public hearing ket mapaayaban dagiti stakeholders nga involved a pakaibilangan ti city health officer, tesorera, medical technologist ken dadduma pay nga involved a pakataktakdanda ken pakaapektaran ti serbisio dagitoy nga opisina ken sabali pay a pagbusbosan ti sangguniang panlungsod iti para merienda, kinuna ni Figuerres.

Ania pay ti mapagpapatangan ket naisayangkat metten ti hearing iti kallabes? nakuna pay ni Figuerres.

Innayon ni Figuerres nga inrekomendar metten ti com-mittee on ways and means ken revenues ti pannakairaman ti nasao nga ordinansa a maiplastar a maamendaran tapno mammaminsanen.

Ngem segun ken ni Villanueva, naikalendario ti ordinansa a maibasa iti first reading ken saan a nairaman a maibasa para iti second reading agsipud ta awan pay ti numerona.

Masapul a masurot ti internal rules and -\procedure, kinuna ni Villanueva.

Ngem pinaboran dagiti konsehal iti baet ti objection Konsehal Ramil Arce, chairman ti committee on rules, ti pannakaisingit a maikalendario para second reading ti ordinansa ni Figuerres, banag a mapapati a saan a nagustuan ni Villanueva a puon ti kellaat a panangipakaammona nga aglusulos a miembro ti committee on rules.

Kinuna ni Villanueva a nagsaksakripisioda ken nagmimiting kada lawas tapno maaramid ti calendar of business ngem gapu ta saan met a marespetar daytoy isu nga agikkaten a miembro agsipud ta awanen ti birtud ti nasao a komite.

“Ania pay ti serbina nga agmiembroak no saan met la a masursurot ti naited a poder ti committee on rules nga agaramid iti calendar of business?” kinuna ni Villanueva.

Inlawlawag ni Villanueva a nagramut ti isyo iti ordinansa ni Figuerres a di pay naipila para iti first reading ken awan pay numerona a kayatna a mairaman iti calendar of business.

Segun ken ni Villanueva, saan koma a maipalubos dayta kas sagudayen ti internal rules and procedures ngem inaponaran met ti majority ti konseho ket kas panangtakderna iti prinsipiona isu a naglusulos a miembro.

Tapno maliklikan ti panagbinnara dagiti dua a konsehal, inkeddeng ni Vice Mayor Lourdes Baquiran ti panag-recess ti body.

Nagkinnappia dagiti dua bayat ti panagmeriendada ngem imbatad ni Villanueva a saanen nga agbaliw pay ti pangngeddengna nga aglusulos a miembro ti committee on rules.#