Konsehal ti ili, asawana, natay iti aksidente ti lugan

SINAIT, Ilocos Sur – Dua ti natay a pakairamanan ti maysa a konsehal ti ili ditoy ti natay idi sinapgid ti maysa a lugan bayat ti panagdaliasatda iti Barangay Curtin idi malem ti Oktubre 11.

Pimmusay ni Konsehal Efren Yere y Ibañez, 46, ken residente iti Barangay Nagbalioartian bayat ti pannakataming dagiti sugatna iti nadumaduma a paset ti bagina iti Sinait District Hospital.

Grabe dagiti sugat a linak-am ni Erlyna Yere y Esteban, asawa ti konsehal, ket natay a dagus.

Segun iti inisial nga inbestigasion, agpaabagatan a direksion ti Kawasaki Fury, a minaneho ni Yere, kasakayna ti baketna, ket bayat ti panagdaliasatda iti national highway a sakup ti Barangay Curtin, mapapati a sinapgid ti agoberteyk koma nga Isuzu Forward a minaneho ni Adonis Maglalang y Loyola, 36, baro, ken residente iti Barangay San Isidro, Hagonoy, Bulacan.

Gapu iti pannakasapgid ti lugan dagiti biktima, naipuruakda iti daga a nagsagrapanda iti sugat.

Saan a naan-ano ti drayber ti Isuzu Forward ket inaresto dagiti nagresponde a polis.

Iti pannakaisurat daytoy, naipilan ti kaso a reckless imprudence resulting to homicide (two counts) iti Sinait Municipal Court ditoy a nai-docket iti babaen ti Criminal Case No. 3434 maikontra ken ni Maglalang.#