Konsehal ti Vigan City, naglusulos

VIGAN CITY – Nagbakante ti sabali pay a puesto ti kinakonsehal ditoy a siudad kalpasan ti panaglusulos ni Konsehal Franz Ranches itay nabiit.

Iti pannakaisurat daytoy, awan pay ti naisandi iti puestona ngem posible a maysa a kameng ti pamiliana wenno kabagianna ti mangsukat kenkuana.

Segun iti maysa a konsehal, inawaten ni Ranches, three-termer a vice mayor ti Vigan City, ti maysa a puesto iti Laguna Lake Development Authority, maysa nga ahensia  iti babaen ti opisina ti Presidente ti pagilian.

Kapartiduan ni Ranches ni Pres. Benigno ‘Noynoy” Aquino ket isu ti provincial chairman idi eleksion 2010 a nangabakan ni Aquino a kas presidente.

Immun-una ngem ni Ranches, nadutokan ni dati a Konsehal ti Vigan City Everin Molina, sabali pay a dadaulo ti Liberal Party iti Ilocos Sur,  a kas deputy administrator ti National Tobacco Administration nga idadauluan ni dati a Narvacan Mayor Edgardo Zaragoza.#