Footer

Konsehala Puring

“DUMAGASKA pay, konsehala!” inyawis ni Manong Lito ken ni Konsehala Puring a lumabas iti kantina ni Anti Mildred. Manarimaanak a gumatang iti uppat nga itlog ken manteka a pammigatminto.

“Ney, ket madamakay’ met?” inyisem ni Konsehala Puring. Inasitganna ti grupo da Manong Lito a nakapuesto iti dayaen ti kantina. Madamada nga agpayso a mangsiat. Nagettaan a bisukol-Taiwan ti pulotanda a napalalon sa la unay ti adatna. Sumanul-oyda.

“Naimbag la a pangikkat iti bambannog, konsehala,” insungbat ni Manong Andoy.

“Sabagay husto dayta,” inyayon ni Konsehala Puring.

Apagsagpat a singkuenta ni Konsehala Puring. Natayag ken napudaw. Nadalus nga agar-aruat. Naisput, kunami ditoy Zone 5 a purokmi a sakupna.  Ugalinan ti agpaspasiar no kastoy a mumalem.

“Aglalo ita ket permi a panagikamakam kadagiti obra iti talon, konsehala,” innayon ni Manong Ben.

“Pilitek payen,” inkanunong ni Angkel Biyong, “a pariper daydiay tinalonko nupay saan pay unay a natangkenan dagiti dawada. Napigsa kano dayta sumungsungad a bagyo. Super typhoon!”

“Bareng agpangato met laeng ti dalanna inton makastrek iti pagiliantayo, tata,” imbagi met ni Allon, ti baro pay (duapulo ket maysana laeng) a kaduada ken katulongan ni Manong Ben iti talonna. Dati, ken ni Tata Sabas. Ngem pinanawanna ti lakay ta saan kano met a tungtungpalen daytoy dagiti karina. Kas koma iti daydi sangatungbo a kasla bonusna iti dayta a panagaapit. Ngem nalpas met laengen ti sumaruno a panagapit, saan pay a naited ti lakay.

Isu nga ita, kakaasi ni Tata Sabas nga agsapsapul iti katulonganna. Napanna idi kinapatang ni Iliong ngem saan a pinatgan ti barito. Kasano, naistorian ni Allon ken ni Iliong ti kinaimut ti lakay. Nalipatan sa ni Tata Sabas nga agbarkada dagiti dua. Damag a ni Nathan a maysa met laeng a barito iti Purok Balingagta ti uy-uyotanna a kaduana nga agtalon.

“Adayo pay dayta a bagyo, kakabsat,’ inlibbi ni Konsehala Puring.  “Adu pay ti pagbaliwan ti dalanenna. Ribu pay a kilometro sakbay a makapag-landfall. Isu a ditayo koma agdandanag.”

“Wen, a, ngem arig met agpapada ti ibagbaga dagiti weder isteysion kadagiti nagduduma a pagilian, konsehala,” ni Manong Ben. Nangkutsara iti pulotanda kalpasan a nalidokna ti sukatna. “Agasem dayta umabot iti tupipti a pigsana! Ita la a makapuotak iti kasta kapigsa a dumalan ditoy yantayo.”

“Saan nga amin nga ibagbaga dagita a weather station, kakabsat, ket husto,” kunam no asino a kalaingan ni Konsehala Puring. “Asinoda koma a makaammo iti amin? Pagdandanagendatayo laeng, dayta ti ammok.”

Napangilangilak a nangawat iti gatgatangek. Agandar manen ti kinapasaw ni Konsehala Puring. Sabagay, daytan ti indakdakkelna, a kas kuna pay ni tatang idi addaak iti elementaria. Ita nga addan bukodko a pamilia, kastana pay laeng.

Pudno a managpasiar ni Konsehala Puring. Mayat koma met dayta nga ugalina. Ngem anian ta dina pay ammo, makita wenno maibaga koma met dagiti pagimbagan ti masakupanna. Kanayonkami a maud-udi. Kas iti daydi Gulayan sa Barangay a proyektoda a lider. Naladawen idi indanonna kadakami. Ania pay, idi dumteng ti ebalwasion iti naaramid ti tunggal purok nga agsasalisal, apagtubo pay laeng dagiti mulami idinto nga agbungbungan dagiti kabalubalmi. Sa daydi pay idadateng dagiti taga-Department of Health a mangbakuna kadagiti tarakenmi nga aso. Awan ti kapurokanmi a napan iti barangay hall ta dimi met naam-ammuan.

Adda pangabil ni Konsehala Puring. Adda iti abroad ti inauna nga anakda. Ti buridekda a barito ti kabkabbalayda nga agassawa. Saanen nga agad-adal daytoy ta katulongan iti talon ni Tata Derik a lakayna. Nalawa ti daga a tawidna kadaydi nagawan a nagannakna. Ken nanayonanda pay idi addan iti abroad ti balasangna.

NASANGPETAK ni Konsehala Puring iti paraangan iti dayta a tengnga ti aldaw a panaggapuk iti eskuela. Kapatpatangna da nanang, tatang, ken dagiti kaarrrubami.

“Addakayo met, konsehala,” kinunak idi  alsaak ti motorko.

“Wen, mistro,” kinunana. “Umayko man indanon ti bilin ni kapitan a rumbeng ti panagsagana itoy bagyo a sumungsungad. Ken no kasano ti proseso ti panagbakuit no kasapulan.”

“Nasayaat, a, konsehala. Napigsa ngamin ni Ompong. Super typhoon a kunada! Daytoy, awan payen ti klase ta sinuspinden ni gobernador idi pay kanikadua nga aldaw. Ngem napankami latta idiay eskuela tapno kitaen dagiti mabalin pay a maipakni.”

“Ngem no kaniak laeng, mistro, saanen nga umay ni Ompong,” inlibbilibbina.

“Pagkunaam ngay, konsehala?”

“Ibagada nga inton parbangonen ti sangpetna, mistro, ngem kitaem, nakain-init! No talaga a napigsa ken nalawa ti sakupna, bumanesbes koma itan ti angin ken addan tudona!”

“Medio adayo met pay bassit, konsehala. Dinatay pay magma-udan ita, a. Ngem iti sumagmamano nga oras laeng, mabalin a mariknatayon ti isasangbayna. Napardas ket ti pannagnana.”

“Awan…” inngilangilna, “nagsabali ket ngatan ti dalanna. Isu a daydiay, saankon a pinariper dagitay talonmi idiay Batingil. Nakaganganus pay laeng dagiti dawada. Ad-adunto ti apitenmi no mapardanonan. Nanginanton ti irik.”

“Kasanon ngay no iludek ni Ompong, konsehala?” dinamag ni tatang.

Iti damagmi, nasurok bassit a sangapulo nga ektaria ti talon da Konsehala Puring idiay Batingil a sakup ti kabangibangmi nga ili. Napintas dagiti pagayna ken nakananama dagiti dawada. Sabali laeng ti agpito ektaria a kukuada iti barangaymi. Isu a limed nga ap-apalanda ni konsehala. No ar-arigen, isun sa ti kalawaan iti talon.

“Pal-id laeng ni Ompong ti umay kadatayo, manong,” kasla manen kasiguraduan a nagkuna. “Nagmayat ti tiempona!”

“Dagitay, nay, adda iti batog, konsehala, pinaripermo?”

“Koma, mistro, ta ipilit ni lakay. Ngem nagdakkel a pagyamyamanak ta ita a batangmi, nagperdi ‘diay riper. Permi ngarud a siudot ni ‘Pari Stanley. Nagadu pay kano nga awatda a riperen ita nga aldaw.”

“Nasayaat koma ngarud no kasta a saanen nga agtuloy ni Ompong, konsehala,” kinuna ni Ikit Masi.

“Patiendak, manang!”

PASADO alas dies iti rabii. Pumigpigsan ti angin iti aglawlaw. Addan karaipna a tudo. Nagiddep payen ti kuriente. Agingga nga agsagawisiw payen ti aglawlaw.

Napatanamitimak laengen.  Dakkel la ketdi ti perwisio nga ibati ni Ompong. Dakdakkel nga amang ngem daydi Lawin a nangdalapus met laeng ditoy Tanap!

Pudno, iti kabigatanna, nakalawlawag iti aglawlaw. Natuktukkol ken nasualit dagiti kayo. Adu a kaarrubami ti naitayab ti bubongna ken nagirig dagiti balayda. Naitayab met ti sim iti kosinami.  Kasla papel a kinunesna dagiti nabatbati.

Manarimaankami ken baket nga agipakni kadagiti wara iti aglawlaw idi kumaribusoda iti lipit iti amiananenmi. Indissok ti karaykay a pagdaldalusko ket napanak iti yan dagiti kaarrubami.

“Apay, angkel?”  inamadko ken ni Angkel Pulon nga immuna a nasungadko.

“Ni Konsehala Puring, mistro,” kinunana. “Nahayblad sa…”

“Apay?”

“Permi a rungaabna a nabigatan. Naidanon kano kenkuana nga awan ti nagmamaayan dagiti pagayda.”

“Ket?”

“Kellaat kano lattan a nadaleb, mistro. Dayta, umarimbanasandan a mangitaray kenkuana iti ospital. Ti makadakes, awan met ti makastrek wenno makaruar a lugan. Agsasanggala dagiti kayo a nasualit. Isu a maysanmaysa ti mapan tumulong a mangbagkat kenkuana.”

Nalagipko ti imbagbaga ni Konsehala Puring iti kalleppas nga allawig.#