Footer

Konstruksion ti diversion road, narugianen

CANDON CITY – Narugianen itay nabiit ti konstruksion ti diversion road babaen ti panakasemento ken panakapalawa ti kalsada a sumrekanna iti barangay Bagar ditoy.

Kinuna ni City Engineer Steve Martinez a napunduan ti nasao a proyekto iti P10 milion manipud ken ni Congressman Eric Singson ket dandani malpasen ti panakasemento ti sungaban ti kalsada agingga iti barangay San Agustin.

Manipud Barangay Bagar, sumalpot ti diversion road  iti San Agustin, San Nicolas, Paras ken iti barangay Calaoaan.

Kinuna ti inhiniero a daytoy ti first phase ti proyekto ket namnamaenna ti tuloytuloy a pannakaaramidna no sumangpeten a naan-anay ti pondo nga aggapu iti gobierno nasional.

Inlawlawagna a  saan pay laeng a paset daytoy iti pondo a naidalan babaen ti Regional Development Council tapno isuda ti mangiyendorso iti nangatngato nga ahensia ti gobierno.

Nainaw daytoy a proyekto a kas solusion iti kumarkaro a problema ti trapiko iti sentro ti siudad ti Candon, nangruna no tiempo ti panagbabasa ken no adda ti pasken.

Kabayatanna, rinugian ni Mayor Allen Singson ti nagiwaras kadagiti school bags ken supplies kadagiti nadumaduma a pagadalan elementaria iti city division ditoy.

Aganay a 2,000 bags a naglaon kadagiti school supplies ti maiwaras kadagiti amin a Grade I pupils iti daytoy a dibision.

Nangrugi daytoy educational support program ni Singson kalpasan ti ilalabas ni typhoon Helen ket immuna a nabenepisiaran dagiti agbasbasa iti Candon South Central School, Candon North Central School, Oaig Daya Elementary School kenBagani Tocgo Elementary School.

Kinuna ti mayor a panggep daytoy a programa a tulongan dagiti nagannak iti panagpabasada kadagiti annakda a dida pakaburiboran ti magastoda iti school supplies.

Sabali pay a programa ni Singson ti pannakaited ti P500 a pinansial a tulong kadagiti first year high school students iti pribado man wenno eskuela publiko para iti agduduma a gastuenda iti pagadalan. (Danny Antalan)