Footer

Kooperatiba dagiti tindero iti tiendaan ti Baguio City, natakawan

BAGUIO CITY – Inside job ti kitkitaen dagiti polis ditoy siudad nga anggulo iti panagtakaw iti opisina ti maysa a kooperatiba iti tiendaan publiko ditoy a nakakasakasan iti P270,000.


Tinakawan dagiti di pay nabigbig a mannanakaw ti Baguio Market Vendors Association iti karabian ti Nob. 22 wenno kabigatanna babaen ti panangikkatda iti lansa ti landok a window grills sada pinuersa a linuktan ti sliding door iti sumrekan ti opisina iti umuna a kadsaaran.

Puersa a linuktan dagiti mannanakaw dagiti drawers dagiti lamisaan a nakaidulinan iti mapapati a P140,000 a cash.

Pilit a linuktan dagitoy ti kaha de yero ket kinasakasda ti linaonna a kuarta a mapattapatta a nasurok a P130,000.

Segun iti inbentario ni Maria Theresa Gatchalian, kahera ti kooperatiba, agdagup amin dagiti natakaw iti P270,710.

Iti inisial nga inbestigasion dagiti polis, agkaiwara iti uneg dagiti segunda mano a lupot a mapapati nga inaramat dagiti mannanakaw a nangtakkab iti tawa ti opisina bayat ti panagtakawda.

Mapapati nga imbati dagiti aglaklako iti “wagwagan” dagitoy nga aruaten.

Kinuna pay ti polis a naglibas met laeng dagiti mannanakaw iti simrekanda.

Iti pannakaisurat daytoy, di pay ammo ti kinasiasino dagiti nangisayangkat iti panagtakaw iti opisina ti kooperatiba dagiti aglaklako iti tiendaan.#