Korte Suprema nagbutos 9-5 pabor pannakaitabon ni Marcos iti Libingan ng mga Bayani

Awanen ti legal a lapped iti pannakaitabon ni dati a Presidente Ferdinand E. Marcos iti Libingan ng mga Bayani, daytoy kalpasan nga imbasura ti Korte Suprema dagiti petision a mangpaspasardeng iti pannakaitabonna iti LNMB.

Babaen ti butos a 9-5, imbasura ti Nangato a Pangukoman dagiti petision a mangkonkontra iti pannakaitabon ni Marcos iti Heroes’ Cemetery.

Nagbutos a pabor iti pannakaitabon ni Marcos iti LNMB da Associate Justices Arturo Brion, Presbitero Velasco Jr, Diosdado Peralta, Lucas Bersamin, Mariano del Castillo, Jose Perez, Teresita de Castro, Jose Mendoza, ken Estela Perlas-Bernabe.

Kimmontra da Chief Justice Maria Lourdes Sereno, kaduana da Senior Associate Justice Antonio Carpio, ken Associate Justices Marvic Leonen, Francis Jardeleza, ken Alfredo Benja.

Nag-inhibit iti kaso ni Associate Justice Bienvenido Reyes. Saan nga imbaga ni Reyes no apay a nag-abstain, ngem fraternity brother ni Presidente Rodrigo R. Duterte iti San Beda College of Law ken isu ti nangibagaan daytoy a pabor iti pannakaitabon ni dati a Presidente Marcos iti LNMB. Ni pay Reyes ti dati nga abogado ti pamilia ni dati a Presidente Benigno Aquino III.

Maipalagip a namindua a pinawaywayan ti Korte Supreme ti status quo ante order sakbay ti panagdesisionna idi Nobiembre 8.

Segun ken ni SC Spokesperson Theodore Te, iti sumagmamano nga argumento ti majority: awan ti nakaro a panagabuso iti diskresion ni Presidente Duterte iti panangibatadna a pabor a maitabon ni Marcos iti LNMB; awan ti linteg a mangiparit iti pannakaitabon ti dati a Presidente iti nasao a sementari; addaan ti gobierno iti bileg a mangireserba iti babaen ti Administrative Code dagiti daga a mausar para iti public domain; iti paglintegan ti AFP, ikut ni dati a Presidente Marcos dagiti kualipikasion a maitabon iti LNMB gapu ta dati a commander in chief, dati a soldado ken dati a sekretario iti national defense; saan a naikkat ni Marcos nga awanan dayaw; saan a nakonbiktar ni Marcos iti aniaman a pangngeddeng a nakainbolbaran ti moral turpitude.

Rimmuar ti opisial nga statement manipud iti Korte Suprema idi agarup 3:00 ti malem ket sinabat dagiti iriag ken sipsipat manipud ti tallaong dagiti Marcos supporters a nangiwayat iti prayer march ken nagpatpatnag a vigil iti sanguanan ti korte. ]

Maliwanag ang batas… ‘wag na tayong magdebate. Kung ano man ang galit sa inyong mga puso, let it go na po at magpatawad na lang. Mag-move on na tayo. Magkaisa na ang Pilipinas,” indagadag ni Ilocos Norte Governor Imee R. Marcos iti maysa nga statement.

Kanaig daytoy, impeksa ti gobernadora ti panagyamanna kadagiti nagiwayat iti natalna a rali, vigil, signature campaign ken ti tallo nga aldaw a Kailian March manipud iti Paoay, Ilocos Norte agingga iti Supreme Court kas panangipaneknekda ti suportada iti pannakaitabon ti dati a Presidente iti LNMB.

Awan pay ti impakaammo ti pamilia Marcos no kaano a maitabon ti dati a Presidente iti LNMB.#