Footer

Kotse, motorsiklo, nagdinnungpar

CAOAYAN, Ilocos Sur – Nasugatan ti drayber ti motorsiklo ken ti kalubbonna idi nakidinnungpar ti luganda iti maysa a kotse iti national road a sakup ti Barangay Callaguip ditoy nga ili idi agarup 1:05 ti bigat ti Abril 23.

Naitaray iti Gabriela Silang General Hospital ni Rey Albert Eugenio y Frial, 22, baro, ken residente iti Barangay Naguillan ditoy met laeng nga ili ken ti backriderna a Debrick Frial y Quiane, 22, baro, ken residente iti Barangay Camanggaan, Vigan City.

Natukkol ti tulang ti makannigid a gurong ken nadundunor ti nadumaduma a paset ti bagi ni Eugenio idinto a nagsagrap iti dakkel a dunor iti tumeng ni Frial.

Naammuan iti inbestigasion dagiti polis nga agpaamianan ti Honda Civic a minaneho ni Conrado dela Cruz y Quirap, 62, naasawaan, ken residente iti Barangay Don Alejandro Quiriligico, Caoayan, idinto a kasabatna ti Yamaha Mio a minaneho ni Eugenio ket iti nakapasamakan ti aksidente, mapapati nga inobertekan ni Eugenio ti sabali a motorsiklo a gapu iti kimmautanna iti linia ti kotse.

Mapapati a nupay pinadas ni dela Cruz a lisian ti motorsiklo, nagdinnungparda latta.

Inabandona ni dela Cruz ti kotsena iti tengnga ti kalsada ket dagus a simmuko iti police station ditoy.

Agpada a nakaro ti dadael ti sungo ti dua a lugan.#