Footer

Kotse nakursonadaan ti grupo a binato

CANDON CITY – Posible a di napnek ti maysa a grupo dagiti revellers iti panangselebrarda iti isasangbay ti baro a tawen isu a nakursonadaanda a binato ti maysa a kotse iti national highway a sakup ti Barangay Tablac ditoy siudad.

Nagpulong ni Ludwig Adaza, Jr. y Bagsican, 31, baro, ken residente iti Kapitolyo, Pasig City iti polis ditoy siudad a nabato ti kotsena bayat ti panagdaliasat daytoy iti highway a sakup ti nadakamat a barangay idi agarup 3:55 ti agsapa ti Enero 1.

Segun ken ni Adaza, nabuong ti akinsango a sarming ti kotsena. Nupay kasta, awan ti nadunor kadagiti di nainaganan a kaduana iti lugan.

Sinawar dagiti polis dagiti di nabigbig a suspek ngem saanda a nasarakan dagitoy.#