Kotse, natinnag iti derraas gapu iti nuang

SANTIAGO, Ilocos Sur -Nuang ti nakaigapuan ti pannakatinnag iti derraas ti maysa a kotse iti Barangay Dan-ar ditoy nga ili.

Nakaro ti dadael ti Ford Lynx, addaan plaka WJX-949 a gapu iti pannakaiderraasna iti pananglisi ti nagmaneho a ni Marlon Sipin, 27, baro, agnaed iti Mt. View, Angeles City iti maysa a nuang bayat ti panagdaliasatna iti nasao a barangay ditoy.

Segun iti inbestigasion, pinadas a liklikan ti drayber ti bimmallasiw a nuang ngem dina nakontrol ti manibela ket nasalapon ti lugan ti kusina ti maysa a pagtaengan sa natinnag iti derraas nga aguneg iti walo a metro.

Nupay kasta, saan a naan-ano ni Sipin. (Danny Antalan)