Kotse, nauram

BANTAY, Ilocos Sur – Awanen ti serserbi ti maysa a kotse gapu ti pannakauramna a mapapati a nagtaud iti nagrissik a barut bayat ti panagdaliasatna iti rangtay ti Quirino ditoy idi parbangon ti Nobiembre 26.

Iti panagimbestiga dagiti nagresponde a polis ken kameng ti Bureau of Fire Prevention ditoy, agpaamianan a direksion ti Mitsubishi Adventure a kukua ken minaneho ni Dirk J. Rompon, 29, baro, ken residente iti Project 6, Quezon City, ngem idi addan iti rangtay, insardeng ti drayber ti lugan idi makaangot iti mapupuoran a barut.

Mapapati a kellaat a rimsik ti barut iti sirok ti tugaw ti pasahero iti maikadua a row a nakauraman ti lugan.

Total a nauram ti kotse a mapattapatta nga agbalor iti sumurok kumurang P400,000.00.

Nupay kasta, saan a naan-ano ti drayber ken ti di nainaganan a pasaherona.#