Kotse, sinapgid ti sabali a kotse

SANTA, Ilocos Sur – Nakaro ti dadael ti dua a kotse kalpasan a sinapgid ti maysa iti aksidente a napasamak iti rangtay a sakup ti Barangay Banaoang ditoy nga ili idi malem ti Hunio 22.

Nadadael ti sungo ti Toyota Fortuner a minaneho ni Francisco Bandolin y Puno, 48, naasawaan, ken residente iti Palaguio, Bocay, Abra ken ti makannigid a sango a bakrang ti Mitsubishi Lancer a minaneho ni Arsenio Car y Azcueta, 42, ken residente iti Barangay Ambologan, Narvacan, Ilocos Sur.

Segun iti report, inobertekan ti Bandolin ti Mitsubishi ngem gapu iti kinagalis ti dalan agsipud iti panagtudona, mapapati a napukawna ti kontrolna iti lugan ket nasapgidna ti makinsango a bakrang ti Mitsubihi ket nupay nagpreno ni Car, nagpusipos ti luganna ket dinungparna ti akinlaud a railing ti rangtay.

Pagsayaatanna ta saan a nadunor dagiti dua a drayber.#