Kotse ti abogado, namartilio

BANTAY, Ilocos Sur – Maysa a kotse ti naireport a minartilio ti lalaki a naglugan iti motorsiklo sadiay Zone 2, ditoy nga ili idi rabii ti Enero 10.

Naireport a naburak ti akinlikud a windshield ti Hyundai Elantra a kotse ni Atty. Joseph Darren Centeno y Castro, 33, awanan asawa, ken residente iti Gov. A. Reyes Street, Vigan City gapu iti panangmartilio ti di nabigbig a suspek a naglugan iti di pay ammo ti klasena a motorsiklo.

Segun ken ni Centeno, imparkingna ti luganna iti sanguanan ti Infinitea idi agarup 8:00 ti rabii iti nasao a petsa sa napan nagmerienda ngem idi agarup 9:50 iti dayta met la a rabii, mapapati a sinardengan ti di nabigbig a suspek a naglugan iti motorsiklo ti kotse ni Centeno sana minartilio ti likud ti lugan.

Dagus a naglibas ti suspek kalpasan a minartiliona ti lugan.#