Kotse ti dentista, nabato

BANTAY, Ilocos Sur –  Nabuong ti likud a sarming ti kotse ti maysa a dentista gapu iti pannakabatona idi apaglabes ti alas dose ti rabii idi Abril 11.

Segun iti report ti polis, matmaturog da Dr. Antonio Rabang y Gorospe, 47, baro, dentista, ken residente iti Barangay Balaleng Laudenia, ditoy nga ili, idi binato dagiti di pay nabigbig a suspek ti Hyundai Elantra GLS sedan a nakaparada iti garahe ken nakabuongan ti akinlikud a sarmingna.

Kas maibatay iti CCTV a naikabit iti balay da Rabang, idi agarup 11: 59 ti rabii ti Abril 10 ken 12:04 ti agsapa ti Abril 11, dua a suspek a naglugan ti motorsiklo ti namindua a nangbato iti Toyota Fortuner SUV a naiparking iti abay ti Elantra ngem dida napuntaan.

Iti 12:14 iti dayta met la a petsa, binato manen ti back rider ti lugan ngem ti Elantra ti natiruan.#