Kredibilidad ti police narco list

ITI nainget a kampania ti agdama nga administrasion kadagiti maatap nga adda pannakainaigna iti illegal a droga, kasano ti kredibilidad ti proseso ti intelligence gathering and validation kadagiti masuspetsa a police scalawags wenno ninja cops a mapapati a drug traders wenno protector dagiti drug dealers?

Rimsua ti nabara a kontrobersia iti Philippine National Police kalpasan a naireport ti kaadda ti narco list ni Presidente Rodrigo Duterte a nakaipalaonan dagiti 357 a kameng ti PNP pakairamanan ti maysa a brigadier general ken dadduma pay nga opisial.

No man pay saan a nainaganan iti publiko dagiti nairaman iti police narco list, adu dagiti naklaat idi nairakurak a nairaman ni Lieutenant Colonel Jovie Espenido, ti kontrobersial a police officer ken mabigbig kas drug war poster boy, ken maysa kadagiti pinadpadayawan ni Presidente Duterte gapu kadagiti gapuananna kontra illegal a droga.

Uray no “classified information” ti linaon ti police narco list ni Presidente Duterte ken limitado laeng dagiti sigud a makaammo iti linaonna, adu dagiti nasdaaw sadiay PNP National Headquarters iti Camp Crame idi nakitada ni Espenido a maysa kadagiti polis a nayakar iti Office of the PNP Chief, ken nakitaripnong ken ni General Archie Francisco Gamboa maipapan iti pannakairamanda iti narco list ti Presidente. Immandar ni Gen. Gamboa a nasaysayaaten a dagiti “guilty” nga agretirodan a nasapsapa agingga iti dayta nga aldaw tapno saan a maapektaran dagiti maawatda a benepisio ken tapno saanen a madadael ti reputasion ti sibubukel a PNP. Impakaammona nga uray no makaretirodanton ket maituloy latta ti kriminal a kaso kadagiti maduktalan nga adda basolna.

Kalpasan dayta a pannakitaripnong ni Gen. Gamboa kadagiti naipalaon iti police narco list ket nakompirmaran ti pannakairaman ni Espenido iti listaan. 

 Naglatak ni Espenido gapu ta isuna ti Chief of Police sadiay Albuera, Leyte idi mapapatay ni Mayor Rolando Espinosa babaen kadagiti polis kabayatan ti pannakaikulongna iti sub-provincial jail. Ni Espenido pay ti Chief of Police sadiay Ozamiz City idi mangisayangkat dagiti polis iti operasion iti pagtaengan ni Mayor Reynaldo Parajinog a nakatayan ti alkalde ken 14 pay napapatay pakairamanan ti asawa ken dua a kabsat ti Mayor.               

Sakbay ti pannakayakar ni Espenido iti Office of the PNP Chief ket nadestino sadiay Bacolod City Police Station kas Deputy Chief for Operations ken Head ti Drug Enforcement Unit.

Binabalaw ni Espenido dagiti ngatuenna iti PNP agraman ni Gen. Gamboa iti pannakairamanna iti narco list gapu iti “failure of intelligence” ta saanda a naproseso a nasayaat dagiti impormasion. Mamati ni Espenido a nairaman ti naganna iti narco list gapu kadagiti maimpluensia a tattao a nangibaga nga adda pannakainaigna iti illegal a droga. Impakaammona ti panagamakna iti seguridadna iti pannakairamanna iti listaan. Inaklonna nga idi 2016, sumagmamano a bulan kalpasan ti panagakem ni Presidente
Duterte ket nairamanen iti listaan ngem naikkat met laeng idi nadalusan ti naganna.  

Pinalagipan ni Gen. Gamboa ni Espenido ken dagiti kaduana a nairaman iti narco list a liklikanda ti agsarita iti publiko maipapan iti kasoda ta dayta ket rebbengna a matratar iti las-ud iti PNP. Impalgakna nga agtultuloy ti panagalada kadagiti umanay nga ebidensia kontra kadagiti polis a nairaman iti narco list tapno mapilaanda iti kaso. Impakaammona nga agtalinaed a saan a mairakurak iti publiko ti nagan dagiti polis a naipalaon iti narco list ta maibilangda nga inosente agingga a mapudasdasan iti korte ti basolda. 

Impakaammon ni Presidential Spokesman Salvador Panelo a sitatalek pay laeng ni Presidente Duterte ken ni Espenido iti laksid ti pannakairamanna iti narco list, ngem mabalin nga agbaliwto dayta ti makompirmaranto ti kinapudno dagiti linaon ti listaan.

Adda man kinapudnona wenno awan ti pannakainaigda iti illegal a droga dagiti kameng ti PNP a naipalaon iti narco list, adda la ketdi negatibo nga epektona iti kampania kontra illegal a droga ti agdama nga administrasion. Adda la ketdi dagiti maupay no dagiti polis a raraemen dagiti adu nga umili ket kellaat laengen a mairaman iti listaan ti Presidente a drug dealer wenno protector.

Saan man a napaneknekan dagiti alegasion ken ni Espenido ken dagiti dadduma pay a polis ket umasping met laeng ti napasamak ken ni sigud a PNP Chief General Oscar Albayalde a sakbay ti panagretirona ket naakusaran iti panangprotektana kadagiti sigud a polis a pasurotna a nainaig iti kaso ti “agaw-bato, drug recycling ken kidnapping” idi koronel pay laeng ken Provincial Director sadiay Pampanga.

Ti kredibilidad dagiti narco list ti Presidente ket iyanninawna ti kinasinsero ken kinaepektibo ti administrasion iti kampania kontra illegal a droga. Namin-adun a nangiparuar ti Presidente ti narco list uray awan pay ti umanay nga ebidensia kadagiti nainaganan. Addan dagiti napapatay a nairaman kadagiti listaan, ngem adu met latta kadakuada dagiti siwawaya. Sapay koma ta maidarum ken madusanto dagiti adda aramidna ken madalusan met ti nagan dagiti inosente a nairaman iti narco list.