Krimen, bimmaba ita a tawen no maikumpara idi 2010

VIGAN CITY – Bimmaba iti bilang dagiti napasamak a krimen iti Ilocos Sur manipud Enero 1, 2011 agingga iti Nobiembre 2011 no ikumpara iti kastoy met laeng a tiempo idi 2010, daytoy ti inreport ti Ilocos Sur Police Provincial Office bayat ti naangay a Provincial Peace and Order Council Meeting a naangay iti siudad ti Vigan idi Disiembre 6, 2011.

Kinuna ni OIC Provincial Director PS/Supt. Noel Amoyen, 643 ti nailistada a kaso ita a tawen, nababbaba iti 249 no ikumpara iti nailista a 892 itay napan a tawen.

Iti index crimes, adda nairekord a 460 iti daytoy a tawen, basbassit nga amang ngem ti nairekord a 627 idi 2010. Iti non index crimes, 183 ti nairekord iti 2011 idinto a 265 idi napan a tawen. Bimmaba pay ti crime rate iti kada bulan ta 8.8 laeng ita a tawen idinto a 12.2 iti kastoy met a tiempo idi 2010.

Segun pay iti report ti ISPPO, ngimmato ti crime solution efficiency ta dimmanon iti 59% ita a tawen manipud iti 43.1% idi 2010.

Segun pay iti datus nga imparang ti ISPPO, napasamak ti kaaduan a krimen iti ili a Narvacan nga addaan iti 131 a kaso idinto a kaaduan met iti pammaltog ti napasamak iti Cabugao nga addaan iti 17.

Kinuna ni Amoyen nga agdagup iti 173 ti natiliwda a kriminal, maysa ti wanted iti rehion, 17 ti wanted iti probinsia ken 155 ti wanted iti munisipalidad. Siam met ti bulontario a simmuko.

Iti 83 nga operasionda kontra iti saan a lisensiado a paltog, adda 76 a naarestoda ken nakasamsamanda iti 83 a loose firearms.

Iti met 527 nga aksidente a nairekordda, adda 463 a nasugatan ken 88 a natay.

Kabayatanna, impalgak ni Col. Gregorio Catapang, Commanding Officer ti 703rd Infantry Brigade a bimmassiten ti puersa ti grupo a KLG de Lara ken KLG Sinag nga agdakdakiwas iti kabambantayan ti Ilocos Sur, kasta met a bimmassiten ti ikutda nga armas. Awan a pulosen ti barangay a pagum-umokanda nupay adda 21 a barangay a threatened.

“Bimmassitdan gapu ta maaw-awanen ti anag ti ilablabanda nga ideolohia. Saan ngaminen a kanunongan dagiti dadduma pay a pagilian ti pannakilaban iti nadara a wagas. Kaykayat itan dagiti tao ti makilaban iti politikal a wagas,” kinuna ni Catapang.

Iti met panagsarita ti presiding officer a ni Gov. Chavit Singson, inikkanna iti importansia dagiti paset ti kabaybayan a pagrarairaan ti illegal a panagkalap. Indawatna iti PNP ken AFP nga agkammayet dagitoy tapno matiliw saan laeng a dagiti agbungbungbong no di ket sapulenda ti paggapgapuan dagiti us-usarenda a dinamita.

Impaganetgetna pay ti panagusar dagiti motorista iti helmet no agdaliasatda iti highway malaksid iti sentro ti Vigan gapu ta paglinged met dagiti kriminal ti helmetda no pumatayda. Indawat pay ti gobernador ti panangipatungpalda iti “no plate, no travel” tapno maksayan dagiti kriminal nga agus-usar kadagiti bogus a lugan iti panagaramidda iti krimen.

Binallaagan ti gobernador dagti kameng ti PNP a saanda a tulongan dagiti matiliwda nga aglaklako iti droga ken masapul nga isuda ti mangkita a maipan iti pagbaludan dagitoy.#