Kuarta a gunggona, naited iti 2 nga impormante

SAN FERNANDO CITY – Dua a sibilian nga impormante ti immawat iti kuarta a gunggona gapu iti panangipatuldoda iti naglemmengan ti dua a wanted persons ditoy rehion.

Immawat da “Denton” ken “Temyong” iti sag-P90,000 kas gunggonada gapu iti impormasion nga intedda iti polis a nagtungpal iti pannakaaresto idi Marso 25, 2009 ni Marlou A. Alcantara, 35, baro, residente iti Barangay Sta. Lucia, Aringay, La Union ken pannakatiliw ni Manuel Bustos, Jr. idi Abril 9, 2009.

Akusado ni Alcantara a nangrames idinto nga akusado ni Bustos iti double murder iti pannakapapatay da Lolita Mamenta ken Liezel Soriano.

Napatawan dagitoy wanted persons iti sag-P90,000 para iti pannakatiliwda.#