Kuarta, alahas, kinurimes ti Budol-Budol Gang

CANDON CITY – Adda manen nabiktima ti Budol-Budol Gang a nakapukawan ti biktima iti kuartana ken alahasna idi Hunio 5.

Nagreport iti polis ti biktima a ni Yolanda Estabillo Hadoc, 43, residente iti Barangay Nangalisan, Sta. Lucia, Ilocos Sur, a linoko ti maysa a babai ken lalaki a nakapukawanna iti kuartana ken alahasna.

Iti panagimbestiga dagiti polis, alas onse ti aldaw ti Hunio 5, kagapgapu ni Hadoc a nangiruar iti kuarta iti bangko ket magmagna iti kalsada idi inasitgan ti maysa a babai ket nagdamag kenkuana no sadino ti terminal ti Martinez Trans, maysa a bus nga agbibiahe manipud ditoy siudad.

Inladawan ti biktima ti babai nga agtayag iti 4 feet 11” agingga iti 5 feet, kulot ti buokna, nabukel ti rupana ken mapattapatta nga agtawen iti tallupulo.

Insungbat ni Hadoc a dina ammo ti pakasarakan iti estasion ti nasao a bus.

Immasideg ti maysa a lalaki nga aglanglanga a komersiante ken adu ti suotna nga alahas ket imbagana nga ammona ti terminal ti bus.

Mapapati a nagpakuyog ti babai ken ni Hadoc ngem nagboluntario ti lalaki a duadan a mangkadua kenkuana a mapan aglugan iti terminal.

Naay-ayo dagiti dua a sumurot ti biktima iti Stern Mall, San Nicolas ket ditoy nga impakita ti babai a suspek ti maysa a pouch a nagkarga kadagiti napunggos a kuarta.

Impakita met ti lalaki ti maysa a folded envelope a naglaon iti kuarta sana inkabil iti pouch.

Imbaga ti lalaki nga ikabil met ni Hadloc ti kuartana a P7,500.00, wedding ring, ken college ring iti pouch, a tinungpal met ti biktima.

Inrikep dagiti suspek ti pouch sada impaiggem iti biktima.

Impakada dagiti dua a bumirokda iti pagluganan ti babai a mapan iti Ilocos Norte sadanto sublien ti biktima, kagiddan ti panangbagkat ti lalaki kadagiti gargaret ti babai.

Maysa nga oras a naguray ti biktima ngem saanen a nagsubli pay dagiti dua.

Linuktan ti biktima ti naipaiggem kenkuana a pouch ket naduktalanna laengen a pasig a narugos a papel ti linaonna.

Naggawid ti biktima sa nagpulong iti polis-Sta. Lucia.

Kinuyog dagiti polis ti biktima a nagpatulong iti polis-Candon ngem saandan a nasapulan pay dagiti suspek.

Kinuna ti biktima a mailasinna dagiti suspek no makitana ida.#