Kuarta a naisapit iti pakete ti sigarilio, nasikuat

VIGAN CITY – Saan nga isigpit ti kuarta iti pakete ti sigarilio ta dinto adda masulisog a mangsikuat.

Leksion daytoy ni Gerardo Roxas y Relucio, 31, naasawaan, drayber, ken residente iti Talipapa, Cabanatuan City, Nueva Ecija, agsipud ta sinikuat ni Herbert Buen Bautista, residente iti Barangay 7, ditoy siudad ti pakete ti sigariliona a nakaisapitan ti kuartana idi parbangon ti Oktubre 17.

Iti panagimbestiga dagiti polis, agtutungtong da Roxas ken kakaduana iti top load ti delivery truck a nakaparking itri sango ti Gemini Hardware sadiay Alcantara Street, Barangay 3, idi immasideg ni Buen ket dimmawat iti maysa stick a sigarilio.

Nangdutdot ni Roxas iti maysa nga stick iti pakete ti sigarilio a nangisapitanna iti P1,000.00.

Kellaat a ginammatan ni Buen ti pakete sa timmaray a nagpalaud. Kinamat da Roxas ngem didan nakamatan.

Sinawar dagiti polis ti suspek ngem saanda a nasapulan.

Segun dagiti polis, addan kaso ni Buen a panagtakaw iti siudad.#