KUARTAN NAGBALIN PAY A BATO

Komentario ni Eden A. Alviar

KUARTAN, nagbalin pay a bato. Daytoy ti sangsangkamaysa a rikna dagiti nangato nga opisial ti Philippine National Police kalpasan a naibabawi ti nayon a bonusda koma nga aggapu iti Malacañang sakbay ti napalabas a Paskua.

Naibabawi ti nayon a bonus dagiti nangato nga opisial ti PNP kalpasan nga inyanunsio ni PNP Chief Director General Ronald “Bato” de la Rosa nga umawatda manipud iti Malacañang iti additional cash bonus nga aggatad manipud iti P50,000 agingga iti P400,000. Maited koma ti nayon a bonus kalaksidan dagiti regular a bonus nga awaten dagiti pulis ken agpapaay iti gobierno tunggal Paskua kas ti 14th month pay ken cash allowance (PERA). Immunan a naala dagiti agpapaay iti gobierno ti 13th month pay idi pay Hunio.

Kalpasan ti pannakairakurak iti media ti pakaammo ni De la Rosa iti nayon a bonus dagiti opisial iti media, nagsagrap daytoy ti nagduduma a kritisismo nangruna kadagiti netizens wenno iti social media. Naipadamag a sakbay ti pannakaibabawi ti nayon a bonus ket addan dagiti nangato nga opisial ti nakaawat kadagiti para kadakuada. Ngem namandardan nga isublida ti naited kadakuada a nayon a bonus

Maipaay koma ti nayon a bonus kadagiti opisial ti PNP kas insentibo kadakuada ni Presidente Rodrigo Duterte ta isuda ti mangiwaywayat iti kampania a mangpaksiat ti panagraira ti illegal a droga ken dadduma pay a krimen. Saan a nalawag no sadino ti pagtaudan ti pondo a maited a nayon a bonus dagiti nangato nga opisial a pulis. Mapattapatta nga aggapu daytoy iti Intelligence Fund ti Presidente. Maibasar iti linteg, saan a mabalin nga aramaten ti Intelligence Fund nga insentibo dagiti pulis, ngem mabalin daytoy a pangalaan ti gastosen para ti pagala wenno paggatang kadagiti impormasionn para iti seguridad ken pannakalapped wenno pannakasolbar dagiti krimen wenno terorismo.

Uray naulimek dagiti dadduma nga agpapaay iti gobierno iti nayon a bonus dagiti nangato nga opisial ti PNP, adu kadakuada dagiti umapal ken agsinsintir nangruna dagiti kameng ti Armed Forces of the Philippines (Army, Air Force ken Navy), Philippine Coast Guard, Bureau of Fire Protection, Bureau of Jail Management and Penology ken dadduma pay nga addaan iti napeggad a responsibilidad. Uray pay dagiti mangisursuro wenno dagiti agpapaay iti Department of Education ken dadduma pay a departamento ti gobierno ket umapalda ta adu kadakuada dagiti maturtoran kadagiti trabahoda.

Ti naibabawi a nayon a bonus dagiti nangato nga opisial ti PNP ket ipakitana ti panangipangpangruna ni Presidente Duterte kadakuada gapu ta isuda ti kaduana a mangtungpal ti karina a mangparmek ti panagraira ti illegal a droga iti pagilian, ken pannakapasardeng dagiti dadduma pay a krimen. Wagas dayta tapno agtalinaed a solido kas bato ti suporta ti PNP iti agdama nga administrasion nangruna ta nasinged ti PNP Chief iti Presidente.

Agpayso a dagiti pulis ti kangrunaan nga instrumento iti pannakapaksiat ti panagraira ti illegal a droga ken dadduma pay a krimen ken mailabsing iti linteg. Ngem apay a dagiti nangato nga opisial laeng ti maikkan ti nayon a bonus? Saan kadi a dagitoy nga opisial dagiti nabayagen iti serbisio nga awan met ti naaramidanda tapno nalapdan koma ti panagsaknap ti illegal a droga ken dadduma pay nga aramid a maikanniwas iti linteg kas ti illegal gambling nangruna ti hueteng ken masiao? Dagiti nagraira nga illegal iti agdama ket bunga ti pannakikumplot, pannakikanunong ken panagbaybay-a dagiti opisial ti gobierno kadagiti naglabas nga administrasion pakairamananen dagiti dadduma a kameng ken opisial ti PNP.

Ngem rumbeng kadi a manayonan pay laeng ti bonus dagiti nangato nga opisial ti PNP iti laksid a nagadun dagiti pribilehio ken benepisio a nalimed nga aw-awatenda? Saan koma a masiomsioman dagiti kameng ti AFP ken dadduma pay nga agpapaay iti gobierno a napeggad met dagiti trabahoda ken nadagsen met dagiti responsibilidadda. Adu kadagiti soldado ti napegpeggad ken narigrigat nga amang ti panagbiagda nangruna kadagiti nakadestino kadagiti nariribuk a lugar.

Rumbeng laeng a maikkan iti tumutop a sueldo ken benepisio dagiti pulis – kas met laeng dagiti soldado – ta napeggad dagiti responsibilidadda iti pannakatagiben ti urnos, kappia ken talna. Ngem saan a mailibak nga adu kadakuada dagiti nanam-ay ken nalag-an dagiti responsibilidadda. Adu dagiti agtaltalinaed laeng kadagiti air-conditioned a kampo ken opisina nga ad-adda pay a mabenbenepisiaran gapu ta naasidegda kadagiti nangato nga opisial. Saan met a mailibak nga adda dagiti nangato nga opisial a nainanaigen kadagiti illegal nga aramid nga awanen iti serbisio wenno madama a maim-imbestigaran.

Adu a pribado nga umili ti saan nga umanamong iti dayta a maited koma a nayon a bonus dagiti nangato nga opisial ti PNP ta dayta a pondo ket nagtaud iti buis nga imbayadda a mangpadagsen ti panagbiagda. Buis a nainayon kadagiti amin a gatangen a produkto ken serbisio, ken buis iti panagtrabaho wenno propesion dagiti sanikua ken dadduma pay a mabuisan a transaksion iti gobierno.

Nakalkaldaang nga uray dagiti babassit a negosio ken sari-sari store ket ingetan a pagbuisen ti Bureau of Internal Revenue. Uray dagiti mangmangged nga umaw-awat laeng iti minimum wage ket agbuis ken siguden a maikissay kadagiti bassit a sueldoda. Amin nga umili a gumatang iti ania man a produkto wenno serbisio ket agbuis ta nainayonen dayta iti amin a gatangenda. Ngem saan amin nga umili ket agnanaar kadagiti amin a pondo ti gobierno.

Kasapulan ti pagilian dagiti pulis ken soldado tapno dagiti amin nga umili ket agbiagda a natalged. Ngem nasken met nga umno ti pannakaaramat iti pondo ti gobierno a nagtaud iti buis dagiti umili. Amin koma a pagsayaatan a pondoan ken ipaay ti gobierno ket sapasap a pagraranudan, saan laeng a sumagmamano dagiti mabenepisiaran.#