Footer

Kudeta iti Kamara iti panawen ti SONA

NAISANGSANGAYAN ti naudi nga State of the Nation Address ni Presidente Rodrigo Duterte, saan a gapu kadagiti mensahena a pagimbagan dagiti umili, ngem gapu iti kudeta a nangsukat iti liderato iti Kamara de Representante a nangibati ti nauneg a pagpampanunotan dagiti umili.

Nakababain ti kudeta iti liderato iti House of Representatives ta napasamak dayta iti imatang dagiti umili, adu a nangato nga opisial ti Pilipinas ken pannakabagi dagiti nagduduma a pagilian; ken naka-live coveragre iti radio, television ken social media kabayatan ti panangiyur-urayda iti idadateng ni Duterte sadiay Batasang Pambansa.

Nataktak ti nasurok a maysa nga oras ti pannakairugi ti SONA gapu iti kellaat a pannakaisaad a House Speaker ni sigud a Presidente ken agdama a Pampanga 2nd District Representative kasukat ni sigud a House Speaker Pantaleon Alvarez. Naaramid ti imformal a panangpili ken ni Arroyo kas Speaker babaen ti manipesto a pinirmaan dagiti 161 a kongresista uray no awan ti “mace” a simbolo ti liderato ti Kamara, ken awan ti secretariat a pormal a nangi-record ti proceeding. Naiddep pay ti sound sytem iti plenary hall kabayatan ti pannakaisaad ni Arroyo nga Speaker.

Napasamak dayta a karibuso iti plenary hall kabayatan ti panangsabat ni Alvarez ken Senate President Vicente Sotto ken ni Duterte iti isasangpetna iti Batasang Pambansa. Naipadamag a sakbay ti panagsarita ni Duterte iti Plenario, ket narurod ken kinapatangna dagiti dua nga agsalsalisal iti liderato ti Kamara, ket ni pay laeng Alvarez ti nakipag-preside ken ni Sotto kabayatan ti joint session ti Kongreso iti SONA.

Kalpasan ti SONA, naaramid ti pormal a pannakapili ken pannakaisaad ni Arroyo nga Speaker.  Pormal a nagsapata ni Arroyo kas baro nga House Speaker iti panagpili kenkuana dagiti kongresista iti botos a 184 ken 12 a nag-abstained iti kadagupan dagiti 292 a miembro iti Kamara.

Ti kellaat a panagsukat ti House Speaker nga agpada a kaaliado ti Presidente ket ginaburanna dagiti napateg a mensahena a panangituloyna iti nainget a kampania kontra illegal a droga, krimen, kurapsion ken terorismo; panagsukat ti sistema ti gobierno iti federalismo; pannakaaprobar ti Bangsamoro Organic Law; pannakaipalaka ti bagas; pannakasaluad ti nakaparsuan; pannakaitultuloy ti Tax Reform for Acceleration and Inclusion Law; pannakabukel ti Department of Disaster Management; pannakaaramid ti linteg a manggibus ti contractualization, ken dadduma pay a planona.

Naiduma met ti 48 a minutos a SONA ti Presidente ta bassit dagiti ad-lib-na iti panangbasana iti naisagana nga script, ken saan a pulos a nagsao iti dakes. Indariragna ti pannakaitultuloy ti nainget a kampania kontra illegal a droga iti laksid dagiti adu a kritisismo ti pannakalabsing ti “human rights” ta tagipatgenna kano ti “human lives.” Impasindayag idi panawen ti kampania ni Duterte a parmekenna ti illegal a droga iti tallo agingga iti innem a bulan. Ngem nasuroken a dua a tawenna iti turay. Nasuroken a 100,000 dagiti natiliw ken simmuko a drug personalities. Agarupen a 4,500 dagiti napapatay nga adda pannakainaigna iti illegal a droga. Ngem agtultuloy latta ti panagraira ti illegal a droga. Manonto pay dagiti mapapatay nga umili tapno agballigi ti kampania kontra droga?

Kiniddaw pay ti Presidente iti Kongreso ti panangipasada iti linteg a manggibusen iti labor contractualization kas inkarina idi kampania.  Nagaramiden iti Executive Order a manggibus ti labor contractualization a mangipaay ti security of tenure kadagiti mangmangged, ngem nakapsut ti ngipen ti mandarna. Agtultuloy latta ti labor contractualization, kinababa ti sueldo ken kinakirang ti nasayaat a pagtrabahuan iti pagilian.

Impasingkedna pay ti pannakaituloy ti maikadua a paset ti Tax Reform for Accelation and Inclusion Law tapno masuportaran dagiti programa ken proyekto ti gobierno. Indariragna dayta iti laksid ti dakes nga epektona iti ekonomia nangruna iti itatayok ti presio dagiti kangrunaan a produkto ken serbisio a pinakaro pay ti inflation rate wenno panagbaba ti balor ti piso.

Nagballaag pay ti Presidente kadagiti am-ammona a rice trader nga agilemlemmeng iti bagas, nga isardengdan ti panangmaneobrada iti supply ken presio ti kangrunaan a taraon dagiti Pilipino ta no saan ket patiliwna ida tapno madusada. No ammon ti kinatao ti Presidente dagiti agilemlemmeng iti bagas kas kadagiti inrakurakna iti narco-list-na, saanna koman a pinadanon ti nabayag ken nangina unay a presio ti bagas. Patiliwna lattan dagitoy a managgundaway a komersiante a mangsabsabotahe iti ekonomia.

Adu pay dagiti inrakurak ti Presidente a namnamaenna a para ti pagsayaatan ti kaaduan ngem kayat koma a nangeg dagiti umili dagiti direkta ken nasamay a wagas a mangpalag-an ti sagsagabaen dagiti umili kas ti nayon a sueldo dagiti mangmangged ken pannakasuspender pay laeng ti pannakaipakat ti TRAIN Law kabayatan ti panawen a panagrigat unay dagiti Pilipino.

Kinalikaguman dagiti umili a dinengngeg koma dagiti wagas a mamagbalin a nakappia ken komportable ti panagbiagda, ken ti napinget a panangirupirna ti karbengan ti panagtagikua ken soberenidad ti Pilipinas kadagiti teritoriona iti West Philippine Sea nga inkeddengen ti International Tribunal a sakup ti pagilian, ngem sinakupen ti China.

Napateg ti mensahe ti Presidente iti SONA, ngem gapu iti nakababain a pagteng a napasamak a panaginnagaw iti liderato iti Kamara, ket nagaburanen ti mensahe ni Duterte kadagiti umili. Saan a mailibak a ti kangrunaan a nagbati iti lagip dagiti nagbuya ken nagatender iti SONA ket ti pagteng a mangipakita ti kinabisin iti turay dagiti dadduma a politiko.

Napateg a pagpampanunotan dagiti umili iti napasamak a kellaat a panagsukat ti turay iti Kamara iti nagbaetan dagiti dua a kaaliado ti Presidente, ket iyanninawna ti klase ti liderato ti agdama nga administrasion a narigat a talken dagiti politiko no sukatanda ti agdama a Konstitusion ken pagbalinenda a federalismo ti agdama a sistema ti gobierno. (Eden Alviar)