Kuliglig, 5 sako a bagas, natakaw

BANTAY, Ilocos Sur – Saan pay a nasarakan ti hand tractor wenno kuliglig a naireport a mapukpukaw idi bigat ti Abril 29.

Saan pay met nga ammo no siasino ti nangitaray iti kuliglig agraman ti lima sako a bagas a naipempen iti bodega.

Naammuan iti report nga idi agarup 6:00 ti malem idi Abril 28, pinanawan ni Carpio Gelacio y Pichay, 46, naasawaan, mannalon, ken residente iti Barangay Cabusligan, ditoy nga ili ti Kubota hand tractor iti bodega iti bagas.

Ngem idi agarup 6:00 iti kabigatanna, awanen ti traktora agraman ti lima a sako ti bagas.

Agtultuloy ti panagimbestiga ti kapolisan mainaig iti nasao a panagtakaw.#