CANDON CITY – Dua a kuliglig ti inwaras itay nabiit ni Congressman Eric Owen Singson tunggal ili iti distrito nga ibagianna.
Naiwaras dagiti farm machineries iti simple a programa nga inatenderan dagiti mamayor iti maikadua a distrito.
Segun ken ni Mayor Estrella Hernaez ti Santa Lucia, iyawatna dagiti kuliglig iti dua a farmers’ association iti ilina.
“Babaen dagitoy kuliglig, malag-anan dagiti farmers iti ilimi iti panagtalonda,” kinuna met ni Mayor Benjamin Maggay ti Cervantes.
Daytoy ti umuna a termino ni Singson a simmukat iti amana a ni dati a Diputado Eric Singson a saanen a nagkandidato ta naturposnan ti tallo a terminona.#