Footer

Kuliglig nga awan silawna, nadungpar

CAOAYAN, Ilocos Sur – Iti baet dagiti ballaag nga adda silaw dagiti kuliglig nga agdaliasat iti rabii iti kalsada, adda latta dagiti sukir a puon ti pakapasamakan ti desgrasia.

Segun iti report manipud iti polis ditoy, nadungpar ti motorsiklo a minaneho ni Charito Aquino, 47, residente iti Salindeg, Vigan City, ti kuliglig a minaneho ni Manuel Quiba, 43, naasawaan, residente iti Anonang Mayor ditoy gapu iti kaawan ti silaw ti naud-udi.

Naammuan nga agpadaya ti motorsiklo idi masabatna ti kuliglig nga awan ti silawna ket pinadas ni Aquino a liklikan ngem nagabayen ket nadungparna latta.

Nupay kasta, nagsinnurot dagiti dua kalpasan nga immannugot ni Quiba a bayadanna ti dadael ti motorsiklo.#