Kultura ti upland diyo pukawen: Chavit

QUIRINO, Ilocos Sur – Indagadag ni Gov. Luis “Chavit” Singson kadagiti lumugar ditoy nga ili a saanda a pukawen no di ket rumbeng nga ipagtangsitda ti kulturada.

“Nagasatkayo ditoy upland ta saan pay a naalian ti kulturayo. Didiay patad aglalaoken. Nupay saan a malapdan a malaokanto,  ngem ti nasken, saanyo a pukawen,” kinuna ni Singson.

Kas kiniddaw dagiti lumugar, nagiwaras ti gobernador iti kitchen utensils, water pumps, monobloc a tugtugaw, ken sound systems ken isu payen ti nangted iti P20,000 para iti nangabak a barangay iti cultural presentation, P15,000 ken P10,000 kadagiti nagpuesto iti maikadua ken maikatlo ken sag-P5,000 kas consolation prize kadagiti saan a napagasatan.

Kabayatanna, inyawat ni Cong. Eric Owen Singson, Jr. ti tseke nga aggatad iti P500,000 iti asosasion dagiti mannalon ditoy a pagpuonanda iti panagmulada.#