STA. CATALINA, Ilocos Sur – Segun iti maysa a konsehal ditoy, kumarkaro ti problema ti droga ditoy nga ili kas maibatay ti kaaddan dagiti mapapati a naigamer iti daytoy a bisio a naiserrek iti rehabilitasion center.
Iti panangidanonna iti daytoy a problema bayat ti session ditoy, kinuna ni Konsehal Pedro Rafanan a makaalarman ti situasion ditoy nga ili gapu ta addan tallo a kailianda a biktima ti droga a naiserrek iti rehabilitation center sadiay Cabugao.
Nupay kasta, saan nga innaganan ni Rafanan dagiti agar-aramat iti droga a na-rehab.
Mapapati a naasawaan amin dagiti naiserrek iti rehab.
Kanaig daytoy, dinawat ni Rafanan a mapaayaban ti hepe ti polis iti sumaruno a session tapno ipalawagna no ania dagiti programada tapno malapdan ti panagraira ti droga iti ilida.#