SAN EMILIO, Ilocos Sur – Nailatanganen iti pundo para iti tiendaan publiko ti lima a munisipalidad iti upland a pakairamanan daytoy nga ili ket manamnama ti pannakairugi ti pannakaipatakderna iti mabiit.

Naammuan ti Tawid News Magasin ken ti DZTP manipud ken ni San Emilio Mayor Lorenzo Bragado a nailatangan iti P2.5 million ti public market ti lima nga ili a kameng ti Clustered Upland Municipalities of Ilocos Sur (CUMILOS).

“Addan pundona ta dakami a lima nga ili a kameng ti CUMILOS ket nangilatang iti sag-P500,000 para iti daytoy a proyekto,” kinuna ni Bragado.

Buklen ti ili ti San Emilio, Lidlidda, Banayoyo, Gregorio del Pilar ken Quirino ti CUMILOS.

Kinuna ni Bragado nga adda P2 million a counterpart a pundo a naggapu ken ni Congressman Eric Singson ket agdagup ngaruden iti P4.5 million ti pundo para iti nasao a tiendaan.

Inlawlawag ti mayor a nupay merkado publiko ti lima nga ili iti upland municipalities, napili ti San Emilio a pakaipatakderanna ta ditoy ti sentro ti CUMILOS.

Innayon ti mayor a babaen ti nasao a tiendaan, addan paka-ilakuan dagiti produkto dagiti lima nga upland municipalities ket saandan a problema ti pannakaidaliasatna iti patad.