Kumperensia para pannakapasayaat seguridad dagiti instolasion iti rehion, naisayangkat

SAN FERNANDO CITY – Naisayangkat ti maysa a kumperensia para iti pannakapasayaat ti seguridad dagiti napateg nga instolasion iti rehion iti Concord building ditoy idi Nobiembre 25.

Innem a pulo ket maysa a security managers/officers ken dadaulo dagiti napateg nga instolasion, kasta met dagiti naipangruna nga opisial ti PRO1 ti nakipartisipar iti nasao a kumperensia nga addaan iti tema a “Coordination and Cooperation – Key to a Secure Environment”.

Nangted iti briefing dagiti opisial a pakaibilangan da Police Senior Superintendent Mariano Luis M. Verzosa, Jr., hepe ti PRO1 intelligence division, akinsakup dagiti bambanag pakaseknan ti seguridad dagiti local electric power providers, hydro power plants, airports/seaports, water reservoirs, oil depots, mining corporations, big malls, ken dadduma pay a pumadpad a pasilidad; Freddie Evangelista ti La Union Provincial Disaster Risk Reduction and Management Committee (PDRRMC), ken  Police Chief Inspector Silverio L. Ordinado (insurhensia); Police Superintendent Julius C. Suriben, deputy chief of the intelligence division (terorismo); ken Police Superintendent Lambert A. Suerte (Regional Crisis Management).

Nagpaay a moderator iti open forum ni Police Chief Inspector Reynante F. Rodrigo a nakatrataran ti panagaramat iti CCTV cameras kadagiti instolasion, ken pannakikoordinar kadagiti PNP units para iti naing-inget nga iskema ti panagpatrolia kadagiti lugar a nakaipasdekan dagiti instolasion.

Iti mensahena, kinuna ni PCSupt. Bucayu a pagtitinnulongan a responsibilidad ti seguridad dagiti napateg nga instolasion, ket kasapulan ti “panagkokoordinartayo ken kooperasiontayo tapno naballigi a masalakniban ti aglawlawtayo.”#