Kura paroko agpatulong pannakapalitada ti Simbaan ni San Pablo

VIGAN CITY – Agpatpatulong ti kura paroko ti Katedral ni San Pablo kadagiti mannakitinnulong nga umili para iti pannakapalitada daytoy.

Uray ni Bokal Jerry Singson, kiniddawna kadagiti kabaddungalanna iti hunta probinsial iti panangitedda iti tulong iti kura paroko para iti daytoy a gannuatna a pannakapalitada daytoy duog a simbaan ditoy siudad.

Madakamat nga iti kallabes, pinatiktik dagiti mangimaton iti simbaan dagiti diding daytoy tapno maparuar dagiti cobblestones a dati a langana ngem sumagepsep metten ti danum no agtudo ket agbabasan iti uneg.

Naipatakder ti Katedral ni San Pablo idi 1574 babaen ti pammilin ni Juan de Salcedo, pundador ti Villa Fernandina. Nagbalin a katedral idi 1758 idi naiyalis ti Dioses ti Nueva Segovia ditoy manipud iti Lallo, Cagayan.#