Footer

Kurang a koordinasion, pakawaraan iti nasayaat a langenlangen

ITI PATINAYON nga aldaw ti panagbiag ket mangmangngegan latta ti lack of coordination no pumalpak wenno nakusep ti pannakaipatungpal ti maysa a gandat wenno proyekto/aktibidad. Lumtuad nga egostic wenno nangato ti panagkitkita ti agipakpakat iti bagina. Sursurotek met ti action plan, ipettengna, ngem naan-anay kadi ti pannakaiturong ti trabaho wenno aramid no awan ti kaduam nga aggunay?

Kuna dagiti sikologo a maysa pay a makagapu a makusel ti panggep ti ilem ken crab mentality! Mabalin a managapal ken desperado wenno saan unay a napadpadayawan idi ubing pay ti agipakat iti programa ket natural nga iti idadakkelna, panagriknana ket naikuskuspil isu nga agaramid iti pammales. Agbalin ngarud a nadillaw, nasintir, perpeksionista, authoritarian, arsagid, dina kayat ti makorehir, agparparbo, mangilkillo!

Iti indibidual a kabibiag ti tao ket adda dagiti kastoy a madi a galad a di panangipirpirit –panangiginggina. Uray ammona a pagdaksan wenno pagsayaatan dayta a gay-at wenno pinsar, agindidiammo ket ibirokna ti pakatinnagan daytoy. Nangnangruna pay a marubroban no kagurgurana ti tao a kalanglangenna nga agipatungpal, wenno adda naaramidan daytoy a tibkol a dina napupuotan. Aw-awagan dagiti sikologo daytoy iti passive-aggresiveness.

Innayon ti sikologo a kaaduan a mapasamak ti non-coordination iti biang ti indibidual a kasasaad wenno transaksion ken kadagiti asosasion nga agwaywayas – pribado, sekta wenno pampubliko a nakaikappenganda. Kapaliiwan ket a nalaklaka a mapasamak daytoy no agkurang ti komunikasion, awan innuni, bangkana, gaudanna! Nupay kasta, no kankanayon ti panagpapatang, panagkikita, ken panaglalangen, maawis ti panagsisinnurot nupay adda latta dagiti simparat. Napipia, a, ngem daydiay mablangkoka ket dimo ammo ti mapaspasamak. Tadekka a tadek, di met gayam usto ti baddekmo. Adayo ti panagsayaat no kastoy. Kasla sanselmo a mangyaw-awan ti non-coordination ta uray tengnga ti aldaw ket itawtawnaka iti kapanagan.

Nupay mapasamak dagitoy iti grupo, pamilia, gunglo, sekta, ad-adayo wenno manmano a mapasamak iti institusion a kas koma kadagiti sanga ti turay wenno opisina ken dagiti pribado a dadakkel a kompania agsipud ta adda maar-aramid a highest degree of coordination kadagitoy. Ditoy a benneg ket magraduanda iti trabahoda, no matakuatan a nakapuyda wenno saanda a makatulong iti maysa a kompania wenno institusion ket kapilitan a maikkatda pay laeng. Iti ababa a pannao, adda maaramid a performance audit ta kasapulan daytoy a kas kasupapak iti aw-awatenda a pagsayaatan (ehemplo: sueldo, insentibo, tangdan, honorarium wenno bayad).

Adda kapadasan ti am-ammok a nagbalin nga institutional development officer. Umabot iti 30 nga asosasion ti nangbukel kadayta a pederasion ti mannalon iti dua nga ili a sakupna. Dagiti laeng opisial ti kangrunaan a makasangoda no adda kayat ti opisinada nga ipagteng. Ngamin no wanasenda a mitingen dagiti asosasionda ket abotenda iti siam-siam ta agasem met ta umabot iti 6,000 ti kaaduda ken 40 a barangay ti nakaiwarwarasan dagitoy a kameng.

Ti immuna a kinita ti gayyemmi no kasano ti koordinasion dagiti asosasion iti tumunggal maysa. Umuna la unay ti komunikasion. Nagastosan iti load iti celphone – ta adda metten selpon dagiti dadaulo ti gunglo.

Iti pannakimiting ti maysa a barangay, kasapulan a mapakaammuan ni apo kapitan ken dagiti maseknan a komite tapno agatendarda. Dakkel ti pammati dagiti tao iti pangulo ti barangay. Ngem no dadduma, saan nga agkalaingan ti presidente ti gunglo ken ti kapitan ket kapilitan a maangay ti miting uray awan da kapitan. Adda la ket agatendar iti opisina nga agrebbeng, kuna ti presidente. Ngem no adda problema a saan a masolbar iti ikub ti gunglo ken iti nagbaetan ti opisina ken ti gunglo – ni met ngarud apo kapitan ti umuna a madakamat. Saan met a mabalin a labsan. Paisublida met idiay barangay no maipangato ti problema.

Gapu ta nalulok ti koordinasion, ditoyen a mangin-inut a marugnay ti talentalek. Ket no di mairemedio ti panagsisinnurot, daytoy ti pakawaraan ti asosasion.

Kasapulan ngarud ti koordinasion iti pannakaiwayat dagiti aktibidad ken proyekto iti amin a benneg ti nailubongan a panaglalangen. Lalo no agwaywayas ti asosasion nga awan ti kamanganna no agaangat dagiti partesna.

Iti biang ti gobierno sibil, adda aw-awaganda a National Coordination and Statistic Office. Ditoy ti pakakoordinaran dagiti amin a sanga ti turay, linteg, rekursos, tao, galad ken disiplina. Kasla binukel ti kuentas a maymaysa ti ubonna ti kayarigan dagitoy. Awan ti sumiasi. Establisado ti pannakaipasdek ti organisasion ken adda tengngelda a limitasion.

Kabaelan ngata nga aturen dagiti maseknan nga opisina ti kaawan koordinasion iti nagbabaetanda tapno pumintas ti linnangen ken naam-amo ti progreso ti indibidual, pamilia, komunidad ken ti sangkaragup a kagimongan? Agpanunotka man, Kaka?#