Kurong-kurong dimmungpar iti poste; nagmaneho a polis naiyospital

GALIMUYOD, Ilocos Sur – Nabartek ti drayber ti traysikel (kurong-kurong) ket dandani nakidinnungpar iti sabali a lugan isu a sinakayan ti polis ti lugan ti nabartek tapno kuyogenna iti police station nga agpamunaw ngem isu metten ti nadesgrasia a puon ti nakaiyospitalanna.

Naitaray iti ospital ni PO2 Mike Reyyel Sonido y Hecto, 33, awanan asawa, polis-Galimuyod ken residente iti Barangay Cuantacla, Cabugao, Ilocos Sur gapu iti sinagrapna a dunor kalpasan ti pannakaidungpar ti minanehona a traysikel iti Galimuyod-Salcedo Road a sakup ti Barangay Calongbuyan, ditoy nga ili idi malem ti Disiembre 1.

Kas maibatay iti report, sakbay ti aksidente, minaneho ni Rolando Junio, residente iti Barangay Calaoa-an, Candon City ti nasao a kurong-kurong ket dandani nakidinnungpar iti maysa nga SUV.

Malaksid a nabartek ni Junio, awan pay ti plaka ti kurong-kurong, isu a sinakayan ni Sonido ti lugan tapno ipanna ni Junio iti police station tapno sadiay nga agpamunaw.

Ngem mapapati a gapu ta saan a kabisado ti polis ti kurong-kurong a manehuen, napukawna ti kontrolna iti manibela iti nagkurbaan a puon ti nakadungparan ti traysikel iti maysa a poste ket nagpusipos ti lugan sa nabaliktad.

Gapu iti daytoy, nadunor ti rupa ken ngiwat ni Sonido ket naitaray iti Candon City Hospital.

Immuna ngem daytoy, dua a nagsina nga aksidente ti napasamak ditoy met laeng nga ili a nakadunoran dagiti dua a nainbolbar a drayber.

Iti aksidente a napasamak iti kalsada a sakup ti Barangay Patac, nainbolbar ditoy ti maysa a Honda Wave 125 a minaneho ni John Paul Tabaco y Coloma, 21, awanan asawa, trabahador, ken residente iti Barangay Nagsingcaoan, ken iti maysa Honda TMX 155 tricycle a minaneho ni Manuel Collado, Jr. y Gadong, 48, naasawaan, ken residente iti Barangay Sacaang, ditoy met laeng Galimuyod.

Segun iti report, agpada dagiti dua a lugan nga agpalaud, idi nagsardeng ti Honda Wave MC tapno yurayna ti ilalabas ti kasabatna a lugan iti matartarimaan a paset ti kalsada ngem napegges ti taray ti sumarsaruno kenkuana a traysikel ket dinungpar daytoy ti kutit ti motorsiklo.

Kas resulta, nagsagrap ti drayber ti Honda Wave MC kadagiti sugat iti makannawan a takiag ken sakana ket naitaray iti Candon City Hospital para iti madagdagus a pannakaagasna.

Mapapati a nabartek ni Collado idinto nga awan met ti lisensia ni Tabaco idi mapasamak ti aksidente.

Nagareglo dagiti dua a partido tapno saanen a dumanon ti kaso iti korte.

Iti sabali pay nga aksidente a napasamak iti Candon-Salcedo road partikular iti Barangay Nagsingcaoan ditoy nga ili idi rabii ti Nobiembre 28, dinungpar ti maysa a motorsiklo ti maysa a traysikel a nakadunoran ti motorista iti muging ken makannawan a tumengna.

Iti panagimbestiga dagiti polis, agpalaud a direksion ti Honda TMX 155 nga addaan sidecar a minaneho ni Gerry Ballocanag y Ramos, 45, naasawaan, ngem napegges ti taray ti kasabatna a Racal motorcycle a minaneho ni Rodel Gadut y Aduga, 31, baro, trabahador ken residente iti Barangay Bagani Gabor, Candon City ket iti pagkurbaan ti Barangay Nagsingcaoan, mapapati a napukaw ni Gadut ti kontrolna iti manibela ket nakidinnungpar iti traysikel.

Awan ti lisensia a naiparang ni Gadut kadagiti otoridad. (Tawid News Team)