Kusina ti retirado a hues, nauram

SANTA, Ilocos Sur – Faulty wiring ti mapapati a nakagapu iti pannakauram ti kusina ti maysa a retirado a hues sadiay Barangay Marcos ditoy nga ili idi bigat ti Septiembre 13.

Nagresponde dagiti bumbero ditoy nga ili ken ti Narvacan Fire Station apaman a naawatda ti impormasion idi agarup 10:57 iti bigat ti nadakamat a petsa a maur-uram ti kusina ni retired Justice Eloy Bello iti nadakamat a barangay ket nasebsebda ti uram idi 11:40 iti dayta met laeng a bigat.

Timmulong dagiti polis ditoy babaen ti panangimatonda iti seguridad ken crowd control tapno awan ti lapped iti panangsebseb dagiti bumbero iti uram.

Iti pannakaisurat daytoy, di pay ammo ti gatad ti nadadael iti uram.#