Kusinero, napapatay iti karinderia

BANTAY, Ilocos Sur – Maysa pay laeng nga aldaw kalpasan ti isasangbay ti Paskua, maysa a lalaki ti ginudas ti armado a lalaki iti uneg a mismo ti karinderiana idi agarup 7:15 ti sardam sadiay Barangay Balaleng, ditoy nga ili.

Naideklara a natayen ni Edward Amano y Navarro, 40, naasawaan, ken residente iti nadakamat a barangay idi maidanon iti Metro Vigan Cooperative Hospital gapu kadagiti sugatna kalpasan a pinaltogan ti di pay nabigbig a lalaki iti uneg ti KJRV Carinderia idi agarup 7:15 ti sardam ti Disiembre 26.

Saan pay nga ammo no ania ti motibo ti pannakapaltogna.

Iti inisial a panagimbestiga dagiti polis, idi agarup 7:15 ti sardam ti Disiembre 26, maysa a di nabigbig a lalaki ti nagorder iti makan iti asawa ni Amano.

Mapapati a bayat ti panagluto ti biktima iti kusina, simrek ti suspek a nagaruat iti nangisit a diaket ken short pants, kalalainganna ti kababagi ken mapattapatta nga agtayag iti 5’ agingga iti 5’2”, inasitganna ti biktima sana pinaltogan iti sumagmamano a daras iti likud ti ulo daytoy, makannigid a likud ken iti makannawan a paset ti barukongna.

Nakarekobre dagiti polis iti dua a kapsula ken dua nga slug manipud iti cal. 45 iti nakapasamakan ti krimen.

Naipan dagitoy iti crime laboratory para iti pannakaamirisda.#