Kutsero ti Vigan City, agadal iti tour guiding

VIGAN CITY – Naangay ti reorganisasion ti gunglo dagiti kalesaan ditoy siudad itay nabiit tapno mapapigsa ti grupoda.

Ita, kayat dagiti opisial ditoy nga irehistroda ti grupoda iti Department of Labor and Employment tapno sagrapenda met dagiti benepisio nga ipaay daytoy nga ahensia.

Kinuna ni Konsehal George Villanueva nga iyar-aramidandan iti by-laws ti gunglo dagiti kalesaan sada irehistro iti DOLE.

Kinuna ni Villanueva a kayat ti city government a manayonan pay ti ammo dagiti kalesaan mainaig iti tour guiding tapno maipaayda ti nasaysayaat a serbisio kadagiti iluganda a turista.

Innayon ti konsehal nga agsursuro koma dagiti kalesaan nga agingles wenno agsao iti sabali pay a lengguahe tapno no agsaludsod dagiti pasaheroda a turista, masungbatanda dagitoy.

Dakdakkel pay ti masapulanda agsipud ta mangted la ketdi dagiti turista iti tip no mapnekda iti serbisio dagiti kutsero, kinuna ni Villanueva.#