La Union, sinelebraranna Arbor Day babaen ti panagmula iti kaykayo

SAN FERNANDO CITY – Insayangkat ti Provincial Environment and Natural Resources Office ditoy ti naggiddan a tree planting activity iti Agoo ken ditoy siudad kas paset ti panangselebrar iti Arbor Day itay Hunio 25.

Segun ken ni Filipina Atabay, PENRO Information Officer, agdagup iti 8,500 dagiti nadumaduma a klase a bunubon ti immula ti 200 a partisipante a naggapu naggapu iti lokal a gobierno, ahensia ti gobierno ken pribado a sektor iti San Fernando City.

Agdagup met iti 1,000 nga acacia aurie ken 500 bakawan ti immula ti konseho ti barangay ti Sta. Rita West, kamkameng ti Sangguniang Panlalawigan ken staff ken parolees manipud iti Parole and Probation iti Agoo.

Naammuan pay nga agarup 4,000 a bunubon dagiti assorted a fruit trees, kawayan, mahogany ken gmelina ti immula dagiti nakipartisipar a mangisursuro ken estudiante dagiti nadumaduma a pagadalan iti siudad, Naval Forces Northern Luzon, Philippine Airforce, army, PNP, National Grid Corporation of the Philippines,Soiltech, CENTRO ken empleado ti siudad.#