: Labaw: Kamalig ti Gumil-La Union! (Maikatlo a paset) | Tawid News Magazine - Weekly Ilocos News 📰

Labaw: Kamalig ti Gumil-La Union! (Maikatlo a paset)

6) SAAN A SUMUBLI TI PANAWEN. Sarita ni Pelagio A. Alcantara. Apay nga adda dagiti nabaakan a baro? Adu dagiti rason. Kuna ti author iti saritana: di nairupir a karbengan. Ta karbengan ti asinoman ti mangasawa.

Ngem no naparitanka, pinaritannaka dagiti dadakkelmo a kas iti napasamak iti bida, dakkel la ketdi a parikut ti dumteng kenka iti masakbayan.

Ania kadi ti rikna ti maysa a baak a baro? Naliday, siempre. Saan laeng nga iti uneg ti balay ti kawaw no di pay pati biag. Napno kadagiti no koma, a nagipus iti sennaay wenno sakuntip. Pasig nga arapaap ti lubong. Iti panagmaymaysa, makapatay ti kinaulimek.

Ania ti rikna ti agayat a baak? Kas met laeng tay agayat a bumaro. Saan nga agsusurot ti tignay. Lumasbang ti rikna. Agtubo dagiti nabubun-as a namnama. Tumpuar ti isem, ket maaramid ti saan pay nga inaramid.

Nakaay-ayat la unay, wen! No basbasaem ket nakagtengka ditoy a paset ti sarita, no dika immisem, naggarakgakka la ketdi! Nagpintas ti panangiladawan ti author iti nainlab a baak.

Ania ti rikna ti baak a rinabak ti ayat? Kasla napak-olan a bisukol.

Kasla narebba a kasuoran ket nadepdep amin nga apuy ti namnama. Nasakit.

Nakasaksakit. Ngem, saan a maisubli ti panawen, kuna ti author. Nasken a basaem nga umuna daytoy a sarita tapno maarakupmo ti kaipapanan daytoy: ti lalaki nga awan iti kabukbukodanna a daga kasla mannalon nga awan talonenna.

No iti reader response theory a siripen, napintas la unay ti panagbaliw ti rikna a napasamak. Pinaisem wenno pinagkatawanaka ti sarita iti damo, ngem iti udina, malidayanka gapu iti bida. Nagbaliw daydiay mood wenno rikna ti agbasbasa. Narigat ti mangsurat iti kastoy, agpakatawa santo agpaliday iti gibusna, wenno vice versa. Dagiti laeng makuna a managimutektek ken eksperto iti bukodna a pagsasao ti makasurat.

7) TI ELIGIO NI MAESTRA ONOR. Sarita ni Crescensia R. Alcantara.

Kayatmo ti agbasa maipapan iti nagrupsan a sistema ti edukasion? Ti edukasion a binekkel dagiti makabael a mangisubo iti pirak ken bileg iti muging dagiti awanan gaway? Basaem daytoy a sarita. Kastoy ti nagtarayanna.

Sapsapulem ti sarita a nakaipusingan wenno nakabalusingsingan ti karbengan dagiti nakurapay nga ubbing iti nagan ti edukasion? Ta kuna ti tema ti sarita: “Dagiti babassit ti gundawayna iti sidong ti biag, ad-adda koma ti karbenganda iti sidong ti linteg.”

Kayatmo a taldiapan ti sistema ti edukasion a binatekan dagiti adda naganna ken dagiti adda kuartana? Basaem daytoy a sarita. Adda alingasaw a buyok iti panagpili iti agtakem iti departamento ti edukasion, kunam, mabasam kadaytoy a sarita dayta. Nakitam ti balete, saan a makatakder no awan ti kaptanna saan kadi? Kasta met ti mensahe daytoy a sarita!

Ania ti kunam, sapsapulem ti titser nga addaan iti sursuro ken puso?

Basaem daytoy a sarita ket saanka laeng a makasangit iti pannakalukat dagita matam iti kinapudno no di ikalintegam met ti riknam a kas tao.

Unprofessional and unethical ti sapsapulem iti educational system? Adda ditoy dayta a termino. Saan a nakalasat iti natadem a pluma. Takuatem.

Basaem nga umuna ti sarita. Adda amin ditoy ti sapsapulem. Makitam met ditoy ti napudpudno ken pagwadan a titser, ni Maestra Onor. Addaan honor ti panagbiag daytoy a maestra. Maipannakkel daytoy a maestra. Kastoy koma amin a maestra tapno maruk-atan ti kararua ti sistema ti edukasion a balud dagiti didiosen.

Yik-ikkis daytoy a sarita ti irurukuas iti pannakabalud. Maysa daytoy a sarita a panglukat ti nakamulagat a mata iti teaching profession.

8) TI KINANUNONG A SANGA. Sarita ni Crescencia R. Alcantara. Gapu iti inuugma a pammati, nagsalip dagiti agama, ket maysa a napateg kadakuada a dua ti nagsagaba. Naganas nga ibuksilan dagiti rupir iti tunggal maysa kadakuada. Nakapimpintas ti pannakailadawan dagiti eksena. Iti laengen parupa ti sarita ket makapagagaren ken makatukayen iti imatang.

Sarita maipapan iti umno ken saan. Pampamilia a rikiar ti kalintegan ken panangisuro kadagiti saringit. Kayatmo ti maipapan iti kannawidan wenno panagagas a pammati ni Ilokano? Adda ditoy a sarita. Kas iti panangsayo iti nakatnagan ti ubing. Ken panangkarkarma iti sumipnget. Amin dagitoy a pammati ket nailasag ni Ilokano idi un-unana a panawen. Kultura ni Ilokano daytoy. Nakail-Ilokano a sarita.

Gagangay no kua, a naturturay ti ama. Lalo kadagiti banag nga isuda ti nakaikumitan wenno agaywan. Gagangay met a salaknibanda dagiti namnamaenda a pakairanudan. Ngem kasanon no saan nga agtunos ti kapanunotan ti ama ken ti anak? Ania ti mapasamak? Maibalakad a basaen daytoy a sarita tapno maammuan. Napintas ti dramatiko a tekniko a pannakasuratna. Makapnek.

(Adda tuloyna)