Footer

Laboratorio ti droga, naraut, 3 caretakers, nakemmeg

SAN FERNANDO CITY – Panaglabsing iti RA 9165 ti sangsanguen a kaso dagiti tallo a caretakers a mangbanbantay iti laboratorio ti droga a rinaut dagiti autoridad ditoy itay nabii.

Inaresto dagiti anti-narcotics operatives da George Cordero, Andy Tangalin ken Thomas Palaganas kalpasan ti panangsamsamda dagiti ramit ken material nga agpateg iti minilion a pisos iti rinautda a laboratorio ti droga iti Barangay Upper Bimmutobot, Naguilian ditoy a probinsia.

Karaman dagiti sinamsam dagiti operatiba ti 80 bags a soda, 3 gallon nga organic solvent, 79 bags nga iodine crystal, heater, hydrochloric acid ken red phosphorous a mapapati a maaramat iti pannakapartuat iti shabu.

Naisayangkat ti panagraut iti nasao a laboratorio babaen ti nagtipon a bunggoy dagiti operatiba a pakairamanan ti Philippine Drug Enforcement Agency, Philippine National Police Crime Laboratory, Police Regional Office 1 ken ti La Union Provincial Police Office.#