SALCEDO, Ilocos Sur – Napaltogan a puon ti nakatayanna ti maysa a trabahador sadiay Barangay Ubbog ditoy nga ili idi aldaw ti Nobiembre 3.
Nainaganan ti biktima a ni Jaime Tumopiat y Abalos, 46, laborer, naasawaan, ken residente iti Sitio Arnap, Barangay Balidbid ditoy ken ti suspek a ni Felix Cortez y Gironella, kalugaranna met laeng.
Kinuna ni Barangay Captain Saturnino Tuwang y Taplod, kadua ti biktima ken dua pay a sabali a napan nagkalap iti Barangay Ubbog, iti nadakamat a petsa a sakbay ti pammaltog, nagsubang ti biktima ken ti suspek.
Mapapati a pinaturongan ni Cortez ni Tumopiat iti Gauge 12 shotgun a nabungon iti sako, inlodna sana pinaltogan ti biktima iti namindua a nagsagrapanna iti sugat iti nadumaduma a paset ti bagina a puon ti nakatayanna a dagus.
Naglibas ti suspek iti amianan a direksion.
Nangisayangkat dagiti nagresponde a polis iti pursuit operation ngem dida nasapulan daytoy.
Nakarekobre ti SOCO team nga indauluan ni Police Inspector Zosimo Calub iti 5 a pedaso ti pellets iti crime scene.
Di pay ammo ti motibo ti pammaltog.#