SANTA, Ilocos Sur – Maysa a lalaki ti nabagsol iti uneg ti tupadaan diay Brgy. Mabilbila Sur, Santa, Ilocos Sur idi malem ti Mayo 15.
Iti report a dimmanon iti Santa police station, binagsol ni Rolando Molina y Pables, 45, naasawaan, residente iti Barangay Mabilbila Sur ditoy nga ili ni Dominador Asuncion y Batin, 60, naasawaan, laborer ti DPWH, kalugaranna.
Iti imbestigasion ti polis, kasangsangpet ni Asuncion iti tupadaan idi inasitgan ti suspek a mapapati a nabartek, ket binagsolna ti biktima. Nupay sinarapa ti biktima ti kutsilio, napuntaan latta ti tianna ken nasugatan ti dakulapna.
Immun-una a naitaray ti biktima iti rural health unit ti Santa sa naiyakar iti Metro Vigan Cooperative and Hospital iti Bantay, Ilocos Sur.
Binirok dagiti nagresponde a polis ti suspek a naglibas kalpasan ti pammagsol ngem saanda a nasarakan.
Mapapati a dati a susik ti motibo ti insidente.#